1992-пи йисхъан мина вари Урусатдиъ октябрин садпи йигъ Яшлу касдин йигъси къайд апIура. Гъябгъюрайи гьяфтайин итни йигъан Хив райондин мектебариъ «Эгьемиятлубдикан сюгьбатар» ччвур тувнайи сифтейин дарс му йигъаз бахш дапIнайи.
Мектебариъ директорарин тербияйин ляхниз лигру заместителари, пионерарин улихь хьайидари ва классарин руководителари улупнайи, сатIиди дарсар тешкил гъапIнийи. Гьелбетда, мектебариан гъапIу теклифназ ваъ дарпиди, му дарсариъ яшлуйирра иштирак гъахьнийи. Дурарин арайиъ чпин байвахт Ватандин Аьхю дявдин йисариин алабхъу касар, далу терефнан зегьметкешар, Дагъустан Республикайин лайикьлу мялимар, табасаран халкьдин устад халачичйир, Игит дишагьлийир, гакIвлин, гъвандин, шюшдин устйир ва хайлин жарадар айи.
Яшлуйири урхурайидариз чпи хъапIу уьмрикан, гъи гъулариъ саб артухъ маш ккамдру, апIури имдру ва арайикан адахьнайи ляхнар-карарикан, дуланажагъдин аьгьвалатнакан, пеъ гъубккишра, дидкан гъуншдиз ктарди дирипIруваликан, хулан аьхюрин гьякь-гьюрмат уьбхюри, дугъаз ккилигури, гергми уьлкьан ктудубтIруваликан, гъулажвуву хал-йишв тикмиш апIури гъахьиш, дугъаз туври гъахьи кюмекнакан, хал-йишваз, мал-къарайиз хатIа-балa гъабхьиган, пулиинди кюмек апIури гъахьиваликан, саб гафниинди, жара касдин сумчир-саламра, пашманвалин дюшюшра жвуванубси гьисс ва пай апIури гъахьи деврарикан, халкьдин аьдатарикан, культурайикан, ва тарихнакан ктибтнийи.
«Жан баяр-шубар, учву фужар ва фицдар гъуллугъариъ гъахьишра, инсанвалин шартIар мудурганай, миннат ва васият вуйич. Инсан жилиина гъюб гьунар дар гьа, хъа бабкан духьну, дукIну гъягъяйиз, намус, гъир’ят заан дережайиъ уьрхюри, жвуван халкьдин, гъулан, тухум-тарайин кьимат асккан дарапIди, абур-сабур дудрубгди, баркаллувалиинди, гьякьлуди ва гьялалди уьлин кьацI ипIувал гьунар ву. Гьюрматлу веледар, ушв тIапIну, жарариз фициб вушра гаф кIайиз, учIврушин тувайиз, диди, жвуваз фициб тясир апIуруш, гьаддикан фикир апIинай. Мелзну йиччвра хуру, балара», насигьятнан гафариинди илтIикIнийи яшлуйир живанарихьинди. Жюрбежюр абйирин мисалар, тахаллусар хури, ихтилатар ктитури, яшлуйири баяр-шубарихъди маракьлу сюгьбатар гъухнийи.
Чпин терефнаан урхурайидари яшлуйириз йигъар улихьна чпи аьгъю дапIнайи шиърар кIваъланди дурхну, аьхю чухсагъул мялум гъапIнийи.
