27-пи сентябриъ Мягьячгъалайиъ Дуставалин хулариъ «Баб-Ватанди дих апIура» ччвур тувнайи яркьу акция кIули гъубшну. Думу акция, Урусатдин армияйин, РФ-дин Президент Владимир Путиндин тереф уьбхюри, Дагъустандин жямяаьтлугъдин сагъу фикрин инсанар сатIи апIбан бадали, РД-йин милли политикайин ва диндин ляхнариз лигру министерствойин кюмекниинди «Дагъустандин дишагьлийирин союз» Дагъустандин региондин жямяаьтлугъ тешкилатди тешкил гъапIуб вуйи. Акцияйин метлеб — жвуван Ватан, ихь Урусат бадали сатIи хьувал, инсанарин ватанпервервалин гьиссар ачухъ апIувал вуйи.
Акция Урусатдин Федерацияйин гимн йивбалан ккебгънийи. Залиъ айи вари касари гъудужвну, гимндиз чпин гьюрмат улупнийи.
Серенжем ачмиш апIури, Дагъустандин дишагьлийирин союздин председатель Интизар Мамутаевайи чан удучIвну улхуб гьамци ккебгъну: «27-пи сентябриъ Дагъустандин дишагьлийирин союзди жара серенжем – «Ягълухъ – ислягьвалин лишан ва халкьдин рюгь» ччвур тувнайи, регионарин арайиъ вуйи фестиваль гъабхуз планламиш дапIнайи. Гьяйифки, думу серенжем гъабхуз гъабхьундар. Гъи душмнари ихь уьлкейиъ айи аьгьвалат гъизгъин апIуз, халкь гьюкумдиз аьксиди дерккуз чара абгурайивал ачухъди рябкъюрахьуз. Дагъустан гизаф миллетарикан ибарат вуйи, жюрбежюр динар хъаърудар сатIиди яшамиш шулайи республика вуйивализ лигну, ихь дагълу юрд гьаммишан душмандин тюфенгин люлейиин ал. Душмандиз ихь арайиъ цIа ипуз ккунди а. Мициб аьгьвалатнаъ ухьу гьапIну ккунду?! Сабпиб, алдатмиш апIуз гъид-ритувал, сабур апIувал. Ухьу кьюбан, шубубан артухъди ляхин дапIну ккунду, агьал-йирихъди аьлакьа дудубгну ккундар. Дурариз ихь уьлкейиз айи хатIайикан, сабур дапIну, ихтиятди гъузну ккуниваликан, ватанперверваликан кидибтну ккунду. Гьамусяаьт, ихь Ватандиз читин вахтна, ухьу вари ихь Президент Владимир Владимирович Путиндин регьберваликкди сатIи духьну, душмандиз лайикьлу жаваб тувну ккунду.
Ихь Баб-Ватанди Урусатдин ягь-намус уьбхюз дих апIура», – къайд гъапIнийи Интизар Мамутаевайи.
«Ихь Президентдиин, дявдин гъуллугънаъ айи эскрариин хъугъ’вал алихь. Хъугъ’вали инсан ижми, кьягьял апIуру, хъа хъугъ’вал адрурикан гучIбях шулу. Мобилизацияйиккан кIул ккадабгъну, жилар жара уьлкейиз гьергну гъягъювал аьйиб даринхъа?! Украинайиъ гъябгъюрайи хусуси метлеб айи дявдин операцияйиъ сарпи игит гъахьир дагъустанлу даринхъа?! Ухьуз къаршуди фуж дийигънашра, тафавутлувал адар, ихь кIул’ин Первердигар ал! Ухьу гъалиб хьидихьа», –гъапну серенжемдиъ удучIвну гъулху РД-йин милли политикайин ва диндин ляхнариз лигру министр Энрик Муслимовди.
Дагъустандин Халкьдин Собраниейин образованиейин ва илимдин комитетдин председатель Елена Павлюченкойи Дагъустандин жилар ва дишагьлийир гьаммишан чпин дирбаш’валиинди тафавутлу шулайиваликан гъапнийи. «90-пи йисар ухьуз читиндар гъахьну. Гьамусра ихь республика гьич сикинди гъибтбанди дар. Ригъ ккабхъру терефнан футнакрари хъана ихь саламатвал чIюбгъюз чарйир агура. Дагъустандин жиларин ва дишагьлийирин арайиъ саб вахтнара гучIбяхар ади гъахьундар. Мобилизацияйихьан гьергну, жара уьлкйириз гъягъюрайидар гъяркъиган, дерд шулу. Эгер ихь арайиъ жилар гъудрузиш, Ватан уьбхюз ухьу – дишагьлийир гъудужвидихьа. Ватан гьарган дюбхну ккунду», – къайд гъапIну депутат дишагьлийи.
РД-йин жигьиларин ляхнариз лигру министр Камил Сяидовди учв Мягьячгъала шагьрин РОВД-йиъ дидиснайи жигьиларихъди гюрюшмиш гъахьиваликан ктибтнийи. Дугъу дишагьлийирикан чпин веледари наан вахт адапIураш, шлихъди дуствал апIураш гъаразнаъ хьувал ккун гъапIнийи.
Серенжемдиъ акцияйин жара иштиракчйирра удучIвну гъулхнийи, дурари РФ-дин Президент ва Урусатдин армия ихь кюмекназ ккилигурайиваликан гъапнийи.
