Гьар йисан октябрин эвелариъ, вари дюн’яйин 100-тIан артухъ гьюкуматариъ Мялимарин йигъ къайд апIура. Му машквар анжагъ саб мялимарин дар, думу гьарсар касдиз багьа ву, фицики ухьуз гьаруриз уьмрин рякъ ккивдар мялимар ву. Кьаби гъахьишра, гьич саринра сарпи мялим кIваълан гъягъюдар.
Каспийскдин образованиейин центр «15-пи нумрайин мектебдиъ» лихурайи Сейранат Аьбдуллаевайи бицIиди имидитIан мялим хьуз кьаст гъапIнийи. Дугъу Хянгъярин 8 йисандин мектебдиъ 1-пи ва 2-пи классариъ Зульфукьар мялимдин хиликкди гъурхну. Хъасин дугъу 3-пи, 4-пи ва 5-пи классариъ Мягьячгъалайин 33-пи ва 8-пи нумрайин мектебариъ аьгъювалар гъадагъну. 5-пи класс ккудубкIбалан кьяляхъ, риш гъулаз хъадакну гъафну. Дугъу Хянгъярин 8 йисандин мектеб хъуркьувалиинди ккудубкIну.
Сейранат Аьбдуллаева чан таярин арайиъ убхбииндира, айи аьгъювалариинди гьаммишан тафавутлу шули гъахьну.
Дугъан гафариинди, мектебдиъ урхури имидитIан, ккуни мялим Анна Ивановна Дубровинайи шураз чахъди саб классдиъ урхурайи баяр-шубарин дафтрар ахтармиш апIузра ихтияр туври шуйи.
Мектеб ккудубкIбалан кьяляхъ, Сейранат Аьбдуллаева 1979-пи йисан Каспийск шагьриъ айи Точный механикайин заводдиъ электромонтажницади лихуз хъюгъру.
«Хайлин йисари душваъ ляхин апIури гъахьунза. Узу лихури гъахьи цехдин коллектив гьадмукьан ужуб вуйики, думу йисар йиз уьмрин варитIан ужуб университетдин йисарси гьисаб апIураза», – ктибтура Сейранатди.
Узуз айи агъювалар хъанара мюгькам апIбан бадали ва варитIан ккуни пишейин эйси хьпан, бицIидигандин мурад-метлебар кIулиз адабгъбан бадали, 40 йис яш гъабхьиган, узу ДГУ-йин филологияйин факультетдиъ урхуз хъюгъюнза. Магьа гьаддихъан мина 20 йис вуйиз мектебдиъ мялимди лихури. Гьаддиз пуз ккундузуз, мялимвал пише дар, думу – юкIв хъайи ляхин ву», – давам гъапIнийи чан уьмрикан итхилат йиз сюгьбатчийи.
Чан ляхниъ Сейранат Аьбдуллаева, урхурайи баяр-шурбарин мялимси, насигьятчиси, дурарин дустра хьуз чалишмиш шула.
«Узу гьамусяаьт Каспийск шагьрин 15-пи нумрайин мектебдиъ мялимди ва библиотекардира лихураза. Ляхин апIури хайлин йисар вуйиз, ва гьамусяаьт урхурайи баяр-шубар аьгъювалар гъадагъувалин гъавриъ хьуз хъюгънайивалиин узу гизаф рази вуза. Зигьимлу кас гьаммишан кIакIнаъ хьиди. Гъи ухьуз заан образование айи фукьан вушра касар ахьуз, гьяйифки, дурариз тясирлувал адар.
Узу йиз хиликкди урхурайи баяр-шубариз, чпин вахтназ, сагъламвализ ва зигьмиз кьимат ади ккуниваликан гьаммишан кIури шулза. Фу гъабхьишра, вахназ кьимат туври, сагъламвал уьбхюри ва зигьим артмиш апIури яшамиш хьуб лазим ву. Гьаци гъабхьиш, гьарсар кас тмунурихьна гьюрмат ади, гъавриъ ади янашмиш хьуз хъюгъди», – аьлава гъапIну Сейранат Аьбдуллаевайи.
Му мялим, бицIидарин арайиъси, вари коллективдиъра варитIан ккуни мялим ву. Кми-кмиди мектебдиз машгьур шаирариз дих апIури, урхурайи баяр-шубариз Сейранат Аьбдуллаевайи поэзияйин серенжемар тешкил апIури шулу. Учвра поэзияйиин гизаф юкIв али кас ву.
