Улихьна йигъари Дагъустандин туризмдинна халкьдин художествойин сяняаьткарваларин министрин заместитель Анна Безрукова, республикайин жиларинна девлетнан аьлакьйирин министрин заместитель Эмил Татаев ва гьадму министерствойин экономикайинна гьюкуматдин хазна ишлетмиш апIбан къайдайин ахтармишар гъахру управлениейин кIулиъ айи Диана Аьбдурягьманова Хив райондин Мажвгларин ва Ляхлаарин халачйирин фабрикйириз гъушну. Дурар дина гъягъбан себеб – гьюкуматдин мал-мутму мянфяаьтлуди ишлетмиш апIураш, ахтармиш апIувал вуйи.

 

Министерствйириан дуфнайи хялари халкьдин сяняаьткарвал артмиш апIурайи халачйирин фабрикйирин дараматарин, душваъ айи халачйир урхбан алатарин гьял фициб вуш, ахтармиш гъапIну. Кьюбиб идарйиринра пулин дакьатарин, мяишатдин ляхнарин ва гьясиллувалин гьял ахтармиш апIбан кьяляхъ, министерствойин вакилари халкьдин ирс уьбхюрайи ва артмиш апIурайи халачйирин фабрик-йир хътряркьбан ва дурар гьамусдихъантинара артмиш апIбан къарар адабгъну.