Октябрин 10-пи йигъан РД-йин милли политикайин ва диндин ляхнарин министерствойин конференцйир гъахру залиъ, РД-йин Глава Сергей Меликовдин табшуругъниинди Донецкдин ва Луганскдин халкьдин респуб-ликйириз рягьимлувалин кюмек хьади гъушу Каспийск шагьрин депутатарин собраниейин председатель Аьбдулвягьид Жавадовна Хабаровский крайиъ Дагъустан Республикайин вари ихтиярар айи вакил Бейдуллагь Исаев иштирак духьну, пресс-конференция кIули гъубшнийи.
Пресс-конференция ачмиш гъапIу РД-йин миннацдин кIулиъ айи Энрик Муслимовди къайд гъапIганси, гьарганси, гьамусра дагъустанлуйир Ватан уьбхюрайидарин улхьан жергйириъ а – гъийин йигъаз республикайин шубур агьалийиз «Урусатдин Игит» ччвур тувна.
Аьбдулвягьид Жавадовди чпи Лисичанск шагьриз гъягъбан метлебнакан, Донбассдин азад дапIнайи аьтрафариина рягьимлувалин кюмек хьади гъягъбакан, думу кюмекнан гъагъариъ айи 38 жюрейин шей’арикан гъапнийи.
«Аьхирижи гьяфтайиъ, ихь эскрариз варитIан лазим вуйи квадрокоптерар, тепловизорар, рацйир, газдин баллонар, дизель убгру генераторар, резиндин чекмйир, мархьлихьан уьрхру плащар ва гизаф жара алатар ади, гъагъ зигру шубуб машин гьаунча», — ктибтнийи Каспийскдин депутатарин собраниейин председатели.
Дугъан гафариинди, эскрари чиб душваъ ялгъузди адрувал, гьюкмин кIулиъ айидари, бизнесдин вакилари, хулариъ гъузнайи агьалйири Ватан уьбхюрайидарикан фикир апIурайивал гьисс апIували дурарин рюгь за апIуру. БицIидари хъадаънайи кагъзарира кмиди эскрарин юкIвар шад апIура. Гьарсар касди чахьан шлубдиинди кюмек гъапIишра, харжи даршул. Хъа кюмек апIрудар ихь арайиъ гизаф а.
Бейдуллагь Исаевди къайд гъапIганси, думу кьюбпи ражари ЛНР-из гъягъбан метлеб – Урусатдин эскрарин женг гъабхбан рюгь за апIувал вуйи. Ватандиз гъагъи аьгьвалатнаъ кюмек апIувал – гьарсар касдин ватандаш’валин буржи ву. «Учу рягьимлувалин кюмек хьади хусуси метлеб айи дявдин операция гъябгъюрайи йишвариъ ерлешмиш духьнайи 10-тIан артухъ батальонариз гъушунча. Ихь эскрар лазим вуйибдихъди тямин дапIна. Учу гъубху гъагъ уьлкейин Президентди дивнайи месэлйир вахт-ниинди ва мянфяаьтлуди тамам апIуз аьлава кюмек вуйи.
Учу ерли агьалйирихъдира гюрюшмиш гъахьунча. Варидари ихь эскрариз «чухсагъул» мялум апIура. Ерли агьалйирин гафариинди, чпин гъулар-йишвар Украинайин кьушмарин гюзчиваликк ккайи вахтна, дурариз кючейизди удучIвуз, унчIвигъ гъяхъюз гучIури шуйи. Миржид йисан зулмикк гъахьидариз, гъи азадвал дубхьна», – ктибтнийи Б.Исаевди.
Пресс-конференцияйин иштиракчйири СВО гъябгъюрайи йишваз нубатнан ражари рягьимлувалин кюмек хътапIувал планламиш апIура. Гьамус Каспийин флотилияйин эскрар ерлешмиш духьнайи Крымдизра кюмекнан гъагъар хътаиди.
Журналистарихъди вуйи гюрюшдин аьхириъ Энрик Муслимовди РД-йин гьяракатнан штабдин заседаниейиъ жюрбежюр министерствйириз мобилизацияйин дахилнаъди хусуси метлеб айи дявдин операция гъябгъюрайи йишваз гьаънайидарин хизанариз, бицIидариз кюмек тувбан теклифар гьязур апIуб табшурмиш дапIнайиваликанра гъапнийи. Вари теклифариз октябрин 12-пи йигъан дилигну, РД-йин Правительствойи мобилизацияйик кахъу ватандашарин хизанариз кюмек тувбан гьякьнаан къарар кьабул гъапIну.
Шиклиъ: пресс-конференцияйин герен.
