Октябрин 22-диъ Абу-Даби шагьриъ гъабхьи UFC 280 турнириъ пучIу гъагънан категорияйиъ чемпионвал бадали машгьур дагъустан спортсмен Ислам Махачев ва Бразилияйин спортсмен Чарльз Оливейро кчIихбариз удучIвнийи.
Му талитнахьна гъяйиз, кьюрид спортсменари хайлин кчIихбариъ натижалу гъалибвалар гъадагънайи: Махачевди – 22, хъа Оливейройи – 33.
UFC 280 турнир ккебгъайиз улихьна хайлин экспертар ва гьевескрар, Махачевдиз чемпионвалин чIул бадали кчIихбар гъахуз мумкинвал тувувал дюз вуш, фикрарикк ккахъну гъахьну, фицики улихьна йисари дугъахъди кчIихбариъ магълуб гъахьи саркьан спортсмен пучIу гъагънан категорияйиъ варитIан машгьур хьур спортсмендин арайиан дайи. Махачевдихъди кчIихбариз удучIву Дэн Хукер му сиягьнаъ 6-пи йишв’ин алир вуйи, хъа имбу аьхиримжи 4 кчIихуб ихь спортсменди тяйин дапIнайи вахтназ улихьна ккудукIнийи. Гьаддиз UFC-йи Ислам Махачевдиз чемпионвалин кчIихбариъ иштирак хьуз мумкинвал тувнийи.
КчIихбар ккергъайиз кьюрид спортсменарра чпин гъалибвалиин шаклу дайи. Махачев юкьяр дисбаан чаз айи тажрубайиз бразилияйин спортсменди джиу-джитсуйиан цIийиб фукIара адабгъуз даршлувалихъ хъугънайи, хъа Оливейройи учв дагъустандин спортсмендиин сабпи раунддиъ гъалиб шлуваликан гъапнийи.
Сабпи раунддиъ Оливейройи Ислам иццру апIруганси чIюркьюз мумкинвал абгурайи, амма Исламди, дугъан хабариккан ккутIурччвури, гъурдариинди жавабар туврайи.
Раунддин натижайиъ судйирин баллариинди Махачев гъалиб гъахьнийи.
Кьюбпи раунддиъ Махачевди Оливейро жилиинди ккадаркуз чарйир агуз хъюгъю. Амма дугъу, мюгькамди ликариин дийигъну, кчIихуб давам апIурайи. Раунд ккудубкIуз кьюб дакьикьа ккимиди Махачевдин гужли гъурд машнак кубкIу Оливейро алдакнийи, ва Исламди, алархьну, дугъан гардан, нефес хътабгъуз даршлуганси, чIюбкьюз хъюгъю. ЦIиб вахтналан бразилияйин спортсменди учв магълуб гъахьиваликан хабар туври, Исламдик хил кучу.
Гъалиб гъахьибси, Ислам Махачев дишлади Хабиб Нурмягьямедовдин хабаъ архьру. Нурмягьямедовди думу, чан гъюнариина за дапIну, октагон ву-йибси илдицнийи.
«Му чIул йиз тренер Аьбдулманап Нурмягьямедовдиз бахш апIураза», – гъапи Исламди кчIихбарин кьяляхъ.
Аьбдулманап Нурмягьямедов рягьматдиз душнашра, дугъан планар кIулиз удучIвура: вари дюн’яйиъ варитIан машгьур кчIихбариъ дугъан балин кьяляхъ сацIиб вахтналан UFC-йин чемпион дугъан сарсан ученик гъахьну.
Хабиб Нурмягьямедовди (думу гьамус Махачевдин тренер духьна) Исламдин нубатнан кчIихбар 65.8 кг гъагънан категорияйиъ чемпион вуйи Алекс Волкановскийихъди гъахуз теклиф дивнийи. Залиъ кчIихбариз лигуз дуфнайи Волкановскийра, рингдиина удучIвну, учв му мясляаьтнахъди рази вуйивал субут гъапIнийи. Дурарин арайиъ кчIихуб Австралияйиъ кIули гъябгъиди.
