Гъи Украинайин жилариин гъягъюрайи дявдин гьяракатарихьна ихь уьлкейин агьалйирин рафтар жюрбежюрдар ву. Саспидари, хусуси метлеб айи дявдин операция ккебгъбаз саб жюрейинра далилар адайи кIури, неинки уьлкейин кIулиъ айидарин гьяракатар тянкьид апIура, хъа гьацира, мициб ватанра ккундарчуз кIури, жара уьлкйириз удучIвну гъягъюра. Му касар гизафси, тIуб тIубак дириври, чпиз ккуниси уьмур хъапIрайи артистар, блогерар, саб жерге политикар, девлетлу касар ву. Дурарин фикриъ Ватан – жвув бабкан гъахьи йишв ваъ, хъа чпиз гъулайди, рягьят уьмур хъапIуз шлу йишв дубхьна.
Тмундар, Ватандиин къурхулу йигъар улукьнайиган, дидиз кюмек тувуз гьялак шулайидар ву – чпин хушниинди душмнихъди женгариз гъягъюрайи эскрар, жвуван аьгъювалар гъалибвал бадали харж апIурайи духтрар, машинар хъаъру шофер, ва жара пишйирин эйсйир. Ватандин Аьхю дявдин йисариъси, гъира Дагъустандин халкьари чпин эскрариз ипIруб, алабхьруб, дявдиъ лазим шлу жара шей’ар хътаура, пулин дакьатар уч апIура, баяр-шубари дявдин цIиъ айидарин рюгь за апIуз ва дурариз кьувват тувуз мани саламар кайи кагъзар дикIура, чпин хилариинди шиклар зигура.
Табасаран халкьдира, ихь эскрар хусуси метлеб айи дявдин операцияйиъ гъалиб хьпан бадали, лап аьхю пай кивра. Саб терефнаан, гъи кьадар жигьатнаан му дявдин гьяракатариъ варитIан гизаф иштирак шулайидар ихь баяр ву. Гьяйифки, гъийихдарра гизаф а, чпи халис игитарси улупури, душмниз йивувал давам апIурайидарра цIиб дар. Гьаддихъди сабси, ихь ватанагьлийири фронтдиъ айи гъардшариз, баяриз, адшариз чпихьан шлу кюмекра апIура.
Гьаци гьаму гьяфтайиъ ихь ватанагьлийири уч дапIну хътапIу нубатнан гуманитарный гъагъ Луганск Халкьдин Республикайиз хъубкьну. Дидкан газатдиз чан хушниинди Украинайиъ гъягъюрайи дявдин гьяракатариъ иштирак хьуз гъушу Замир Гьяжимурадовди мялум гъапIну. Думу гьамусяаьт ЛНР-ин Халкьдин милицияйин кьюбпи армияйин корпусдиъ гуманитарный кюмек жара апIбан месэлйириз лигрударин кIулиъ а.
Замир Гьяжимурадовди 3 миллион манатдин ипIруб-алабхьруб, дармнар, жунйир, аптечкйир, духтрариз лазим вуйи жара тадарукар Дагъустандиан Луганскдин областдиз хьади гъафну. Дугъу туву мялуматариинди, му баркаллу ляхниз пулин дакьатариинди аьхю кюмек Халкьдин Собраниейин депутатар Сефер Аьлиевди ва Имран Аваевди, Хив райондин глава Ярмет Ярметовди, Табасаран райондин кIулиъ айи Мягьямед Къурбановди, республикайин медицинайин мялуматаринна аналитикайин центрин кIулиъ айи Эдуард Мустафаевди, Мягьячгъалайиъ ва Каспийскдиъ яшамиш шулайи Хив райондин агьалйири бизнесменар Ниязудин Къурбановди, Сяид Насуровди Аьдипаша ТIаибов ва жарадари тувну.
ЛНР-иъ ерлешмиш духьнайи урусатдин кьушмарин саб частнан медицинайин ротайин операцйир гъахру ва жунйир илдитIру пунктдин командир Ирина Данильченкойи ихь ватанагьлийириз кIваантIан чухсагъул мялум апIура, иллагьки гьамусяаьт гизаф аьхю игьтияж айи медицинайин препаратар хътаувализ.
«Учву киву гьарсаб кепек – му шлин-вуш аьжалихьан гъюбхю уьмур ву. Учвуз йиз терефнаан, узухъди лихурайи духтрарин ва учву чпин баярин уьмрар гъюрхю гьарсар дадайин терефнаан икрам апIураза», – кIура дявдин духтри.
ЛНР-ин Халкьдин милицияйин кьюбпи армияйин корпусдин кIулиъ айи генерал-майор Эседуллагь Абачевдира чан терефнаан ихь ватанагьлийириз чухсагъул мялум гъапIну.
