Гьамусяаьт, ихь вари уьлкейиъси, Дагъустан Республикайиъра пулсузди хуларихъна газ зигбан программа гьяракатнаъ а.

 

 

Хулариз газ зигувалин программайин дахилнаъди Дагъустан Республикайин 304 гъулариан вуйи 2492 хулар газ зигуз региондин программайин план-графикдик каъна кIури, 26-пи октябриъ гъабхьи пресс-конференцияйиъ республикайин энергетикайинна тарифарин министр Ризван Мурадовди мялум гъапIну. Дугъан гафариинди, программайиъ иштирак хьуз ккунидарихьан гъюрайи аьрзйирин кьадар гьар йигъан артухъ шула. Гъийин гъигъаз 3750 аьрза дуфна. Гьадму кьадарнаан 313 кьабул дапIна ва 619 аьрза кьяляхъ тувна. Кьяляхъ апIбан себеб, – аьрза туврайи хуларин документар лазим вуйи саягъниинди гьязур дапIну адрувал ву.

 

«Гъи республика газдихъди тямин дапIнайивал гьелелиг 75,85%-тIан дар. Региондин 11 муниципалитетариъ ва Бежтинский участокдиъ зат газ адар.

Программайиъ инсанар аьшкьниинди иштирак шулайивализ лигну, Урусатдин Президент Владимир Путинди думу 2022-пи йисхъанра давам апIуб тяйин гъапIну.

Мидланра гъайри, программайин дахилнаъди, янаки газ пичрахънакьан зигбан бадали, касибвал кайи, гизаф бицIидар айи ва инвалид касариз кюмек вуди саб ражари туврайи субсидйирин кьадарра 97 агъзур манатдиина за гъапIну», – гъапну министри.

Къайд апIуб лазим вуки, аьхиримжи ражари кIулиъ гъубшу республикайин яшайишдинна экономикайин артмиш’валин оперштабдин зеседанийиъ Ризван Мурадовди Украинайиъ гъябгъюрайи хусуси метлеб айи дявдин операцияйиъ гъийиху эскрарин хизанаризра программайин дахилнаъди льготйир тувбан теклиф дивну.