Ноябрин 22-пи йигъан «Дагестанская правда» газатдин конференцйир гъахру залиъ РД-йин мялуматарин ва чап апIбарин Агентствойин кIулиъ айи Аьбдуразакь Жамалудинов республикайин СМИ-йин журналистарихъди гюрюшмиш гъахьну. Дугъу Агентствойин ляхнин аьлава натижйирикан ктибтну, журналистарин суалариз жавабар тувну.

 

 

Дугъри гъапиш, СМИ-йин вакилари гизафси журналистарин цIибди вуйи маважибдикан, гьаму цирклиз, гизафси милли чIалариинди вуйи газатариз, жигьил пишекрар адруваликан, айидарра саб гьаму ляхниин машгъул вуди гъитуз даршулайиваликан суалар тувнийи.

Аьбдуразакь Жамалудиновди, гьамусяаьт СМИ-йин цирклиъ пулин дакьатарихъди аьлакьалу месэлйир гьял апIбан рякьяр агурайиваликан, чап апIбан милли газатар медиахолдингдиз сатIи дапIну, редакцийирилан административ, мяишатдин ва юриствалин месэлйир гьял апIувал алдабгъбакан, редакторар яратмиш апIбан ляхниин машгъул апIбанди вуйиваликан ктибтнийи.

«Гьамусяаьт гьарсаб редакция жаради вуйи юридический лицо ву. Учу газатарин кIулин редакторарихъди месэла гьял дапIну, холдинг арайиз хувалин йикьрар гъийитIунча. Милли газатарин жаради айи гьарсаб ГБУ сатIи апIбанди гъахьунча. СМИ-йин ляхниз диди манигъвал апIидар, гонорарин фонд артухъ апIуз, ужуди ляхин апIру журналистариз чпин маважиб артухъ гонорар гъадабгъбиинди за апIуз мумкинвалар хьиди», – гъапну Агентствойин кIулиъ айири.
Пресс-конференцияйиъ газатар подписка апIбан, гъулариз газатар гъахувал зяифди вуйиваликан, киоскар адруваликан ва хъана жара месэлйирикан гъулхнийи.
Гюрюшдиъ гьацира Расул Гьямзатов бабкан духьну 100 йис тамам хьувалихъди аьлакьалуди гъахру серенжемариканра гъулхнийи. Агентствойин кIулиъ айири, гъахру серенжемарин дахилнаъди машгьур шаирин 10 томдикан ибарат вуйи китабар чап апIбанди вуйиваликан гъапнийи.