Газатдин 90 йисандин юбилейихъди сабпи нубатнаъ газатдин коллектив тебрик апIураза. Газат Мягьячгъалайиз гъабхихъан мина, дидин гъуллугъчйирихъди узу сигъ аьлакьайиъ гъахьунза.
Ихь халкьдин «Табасарандин нурар» газатди, ихь табасаран халкьдин яшайишдин уьмриъ аьхю роль уйнамиш апIура. Газатдин машариъ асас фикрар гъулан мяишатдикан, медениятдикан, гъуларин гьялнакан, мялимарикан ва жара циркларикан ву. Газатдиъ гьацира Табасарандин улихь вахтарин ва гьамусдин регьберчйирин ва гьацира шаирарин, аьлимарин жюрбежюр ляхнарикан макьалйир чап апIура. Газатдин нубатнан нумра удубчIвру йигъаз ккилигури шлударин кьадарра цIиб дар. Газатдиъ чап апIурайи макьалйир, гизафдар халкь тербияламиш апIрудар ва чIал артмиш апIбаз аьхю фикир туврайидар ву. Думу аргъаж шулайи наслариз гъибтбаз, газатдин коллективди аьхю фикир тувну ва туврира а.
«Колхоздин уьмур» ччвур тувнайи газат урхуз узу мектебдиъ имидитIан хъюгъюнза. Узу сад йискьубан арайиъ газатдиъра лихури гъахьунза. Гизафси гъуларикан жюрбежюр мялуматар, колхозарин хъуркьуваларикан дикIури. шуйза Хючна гъулан мектебдиъ 10-пи классдиъ урхурайи вахтна газатдин редакторихъди, коллективдихъди узу лап багахь аьлакьайиъ гъахьнийза. Темирхан Шалбузовдилан хъюгъну, вари редакторарихъди таниш вуйза. Гизаф ляхин гъубхну Шалбузовдиси, хянгъярин Мягьямед Аьбдуллаев кIуру фронтовикди. Гьадрарихъди сабси Асланбег халуйи, Агъакерим Агъададашевди. Узу газатдиз кьабул гъапIу вахтна, редакторин йишв’ин Хянягъ гъулан агьали Аьбдуселим Гьямзатов лихурайи. Газат артмиш апIбаъ ва уьбхбаъ аьхю роль уйнамиш гъапIну Аьбдулвагьаб Гьямидовди, Вягьид Кьадировди, Къазиаьгьмад Рамазановди. Гьяжиаьли Аьли-мурадовдихъди йиз гизафси аьлакьйир ади гъахьнийиз. Аьбдуриза Аьлиевдихъди ва Гьяжимурад Гьясановдихъдира ляхин апIури гъахьунза. Гъийин гъазатдин коллективдихъдира мани аьлакьа уьбхюраза. Гьамци, газатдин редакция Хючна айи вахтна макьалйир дикIуз хъюгъюр вуйза, ва думу ляхин гьамусра давам апIури имиза.
Ухьу ихь газат, гъазатдиъ лихурайи гъуллугъчйир 90 йисахъди мубарак апIури, газат урхуб, газатдин гъуллугъчйириз кюмек апIуб ихь гьарурин вазифаси гьисс дапIну ккунду. Газатдиз подписка апIуб варидарин буржи ву. Ихь халкьдин кьадар йислан-йисаз артухъ шула. Гьаддиз, табасаран халкь дагъустандин чIатху халкьарин жергейиъ айивал гьисабназ гъадабгъну, РД-йин гьюкуматдин улихь, газатдин машар артухъ апIбан месэла дивуз вахт дуфна ва, гьаддихъди сабси, газатдиъ лихурайидарин кьадарра артухъ дапIну ккунду. Газатдин 90 йис къаршуламиш апIури, ухьу ккебехъну дусну ккундар, газат артмиш апIбан бадали жара месэлйирра гъитIирккну ккунду.
