4-пи декабриъ, 93-пи йисан яшнаъ ади, Дагъустандин Госсоветдин председателди гъилиху, Советарин ва Урусатдин политикайин гъуллугъчи, РФ-дин зегьметнан Игит Мягьямедяли Мягьямедов уьмриан гъушну. Дагъустандин Глава Сергей Меликовдин Указдиз асас духьну, РД-йин Госсоветдин Гьюрматлу председатель кечмиш хьпахъди аьлакьалу вуди, 5-пи декабрь республикайиъ яснан йигъси мялум гъапIну.

 

 

Декабрин 5-пи йигъан Леваши гъулаз Дагъустандин Правительствойин председатель Аьбдулмуслим Аьбдулмуслимов, гьюкмин органарин кIулиъ айидар, депутатар ва гьацдар жара гъуллугъчйир Мягьямедяли Мягьямедов аьхиримжи рякъюъ тIауз гъушну.

Пашманвалин митингдиъ удучIвну гъулху Аьбдулмуслим Аьбдул-муслимовди къайд гъапIганси, Мягьямедяли Мягьямедов дагъустанлуйирин фикриъ гьаргандиз машгьур касди гъузди.

«Думу кас Дагъустандиз варитIан читин йисари гьюкмин кIулиъ гъахьну, чаина жавабдарвал гъадабгъну, дугъу ихь республика, ихь гьюкумат гъюрхну. Ухьу, жигьилари дугъхъан дургъну ккуни ляхнар гизаф а. Дугъахъди вуйи гьарсаб гюрюш – фагьумлувалин, зигьимлувалин дарс вуйи. Гъи ухьу Мягьямедсалам Мягьямедовдиз, баяриз, худлариз, багахьлуйириз, мирасариз, Левашийин ва Дагъустандин вари агьалйириз ихь дерин пашманвал мялум апIурахьа. Мягьямедяли Мягьямедов Аллагьдин рягьматдикк ккайир ишри!» – гъапну Аь.Аьбдулмуслимовди.

Мягьямедяли Мягьямедовдин бай – РФ-дин Президентдин администрацияйин кIулиъ айирин заместитель Мягьямедсалам Мягьямедовди чпин хизандин терефнаан варидариз баркаллагь мялум гъапIнийи.

Дагъустандин кIулиъ айи Сергей Меликовдиз, Мягьямедяли Мягьямедовдин багахьлуйириз, думу кечмиш хьувалихъди аьлакьалу вуди, Урусатдин Президент Владимир Путинди, Федерацияйин Советдин спикер Валентина Матвиенкойи теклифар каърайи телеграммйир хътаъну.

Мягьямедяли Мягьямедов багъри Леваши гъулаъ накьвдик кивну.