13-пи майдиъ Табасаран райондин аьтрафариин, миркк кади, аьхю тIурфан утIубччвну, асас вуди «ТIивак гъулан совет» ва «Хюрикк гъулан совет» гъулан поселенйириз дахил шулайи Хюрикк, Гурхун, ХустIил ва ТIивак гъуларин ругариин.

Думу гъулариъ яшамиш шулайи агьалйирин хусуси мяишатариз аьхю зарарар гъахьну. Мирккли цIийи бегьериз дурзнайи сурсатар, йимишдин гьарар пуч гъапIну. Бязи йишварихь шту гъулариз гъягъюрайи, автомобилари гьяракат апIру рякъярра ккудухну. Райондин администрацияйи мялум апIурайиси, бедбахтвалин дюшюшди туву зарарар аьгъю апIбан бадали, 14-пи майдиъ думу гъулариз райадминистрацияйин ГО-йин ва ЧС-дин отделин, архитектурайин ва градостроительствойин ва гъулан мяишатдин отделарин вакилар гъушну.

Дупну ккундуки, 13-14 майдиъ Дагъустандин саб жерге жара районариъра миркк кайи тIурфан хъивну. Диди Дербент, Акъуша, Буй-накск, Къяйтагъ, Дахадаев районариъ гъулан мяишатариз аьхю зарарар тувну.