Майин 12-пи йигъан вари дюн’яйиъ медицинайин сестрайин йигъ къайд гъапIну. Фуж ву медицинайин сестра? Медсестра фунур вушра духтрин арчулну хил гьисаб ву. Думу рягьимлу юкIв айир, чан ляхин дериндиан ккунир, иццру духьнайи инсандин дерднахъ хъпехъуз аьгъюр, аьзарлуйирихьна вижнасуз дарур духьну ккунду.
Сагъламвал уьбхбан цирклиъ медицинайин сестрайин пишекарвал кадабгъну, хайлин йисари баркаллу зегьмет зигурайи дишагьлийирикан сар – Каспийск шагьрин поликлиникайин участокдин медсестра Фатима Зугьрабовара ву. Пишекарвалин йигъан улихь учу дугъаз «Табасарандин нурар» газатдин редакцияйиз теклиф гъапIнийча.
Ич сюгьбатнаъ Фатима Хайруллаевнайи ктибтганси, медицинайин сестради лихури, дугъан 25 йис ву.
Фатима Дербент райондин Рубас гъул’ан ву. 1991-пи йисан мектеб ккудубкIбан кьяляхъ, думу Каспийск шагьриъ медицинайин училищейик урхуз кучIвну.
«БицIи вахтнахъан мина лизи халат хъайи инсанар гизаф ккунидар вуйзуз. Наанди гъушишра, йиз улар лизи халат хъайи медсестрйириин алди шуйи. Ич адашдин бицIину гъардаш силбарин духтирди лихури гъахьир ву. Узу, мумкинвал ккабхъубси, дугъхьан жиниди, эмдин халат хъабхьну, дугъан давление ебцру ва жара алатарихъди тамшир апIури шуйза. Мектебдин кьяляхъ, адашди узу медучилищейиз урхуз хъади гъушу йигъ гъиси кIваин алмийиз. Думу йиз кIван умударихъ хъуркьу йигъарикан саб вуйи», – ктибтура Фатима Хайруллаевнайи.
Ляхнин читинваларикан улхури, дугъу чпиз гизаф бикIувал алабхъурайиваликан, гьякь-гьисабнан журналар ацIуз гизаф вахт гъябгъюрайивал себеб вуди, иццру касдиз бегьемди фикир тувуз вахт гьубкIри адруваликан гъапнийи. Участокдин мед-сестрайиз улупнайи 1700 касдин ерина, дурарин участок аьхюб вуйивализ лигну, думу 2500-дихьна агьалйириз лигуз мажбур шула.
Медсестрайин асас вазиф-йирик диспансеризация гъабхру агьалйириз вахтниинди мялуматар тувувал, иццру касдин анализар тувру кагъзар, талонар, духтрихьна кьабул апIбан гьисабназ гъадагъру журналар ацIувал кахьра. Духтрихьна илтIикIу касдин уьзур фициб вуш лигну ва дидин гъагъивал гьисабназ гъадабгъну, йисандин муддатнаъ дугъаз швнуб-сабан сагъ’вал ахтармиш апIуз дих апIуру. 25 йисандин арайиъ Фатима Зугьрабовайиз 4-5 духтрихъди лихуб кьисмат гъабхьну. Думу вари духтрарикан лап маниди улхурайи.
Фатимайиз гьарсар касдин кIвахьна рякъ абгуз, дурариз ужуб гаф апIуз аьгъя. Дугъахьна, гьам чан коллективдинси, думу аьгъю вари инсанарин янашмиш’вал лап маниб ву.
«Узуз йиз ляхин лап кIваантIан ккундузуз. Думу маракьлубра ву. Узухь, наана гъягъюрашра, дармнар хьади шулзухь. Мисалназ, узу дадайиин, адашдиин улукьуз багъри гъулаз гъушу вахтна, гьадушваъ кюмек ккун апIури, илтIикIрудар шулу. Хъа Каспийскдиъ узу затра «хулаъ дихърур дар». Яна ляхнин асас вахтнан кьяляхъ шлиз руб йивуз, шлиз капельница апIуз йиз участокдин агьалйирин дихнахъди кюмекназ хъуркьраза. Учву фикир апIинай, 1-пи группайин инвалид касар анализар тувуз фици гъягъиди. Узу, дурарин анализар гъадагъну, лабораторияйиз гъахураза, иццру касдиз уьзрин жвар яваш апIру руб йивураза», – ктибтура Фатима Зугьрабовайи.
Фатимайин уьмрин юлдаш Гьясанбег Зугьрабов «Кредит-инвест» банкдин Каспийск шагьриъ айи филиалин идара апIурайир ву. Дурариз 2 риш ва сар бай а. Аьхюрнур шуру дадайин пишекарвал ктабгъну.
Сюгьбатнан аьхириъ Фатимайи тазади медучилище ккудубкIу медсестрйириз, практикантариз чпин пишекарвализ мюгькам фикир тувувал, ляхниъ гъалатI дееебтувал, гъавриъ адрахъру ляхнин аьхю гъарашугъарихьан, духтрихьан гьерхуз нач дарапIувал ккун гъапIну. Хъа агьалйириз вахтниинди чпин сагъ’валин гъайгъушнаъ хьуз, духтрарихьна гъягъюз тIагъру дарапIуз дих гъапIну.
Учу, Фатима Хайруллаевна кIулиъ ади, вари медсестрйир пишекарвалин йи- гъахъди тебрик апIури, дурариз гележегдиъра инсанарин сагъ’валин гъайгъушнаъ хьуз, сабпи кюмек тувуз кьувват ккун апIурача. Дугъриданра, анжагъ рягьимлу юкIв айи, инсанар ккуни касдихьантIан медицинайин цирклиъ лихуз ва иццру касдиз кIваантIан кюмек апIуз шулдар.
