Гьаму деврин жигьилар, асас вуди жюрбежюр мялуматар гъадагъури, азад вахт гьапIри, сар-сарихъди таниш шули, Интернетдин социалин сетариъ деъна. Аьхиримжи вахтна Дагъустандиъ «Инстаграм» социалин сеть лап машгьур дубхьна. Думу сетдиъ инсанари ариш-вериш апIбан гьяракатарра гъахура, жюрбежюр цирклариан вуйи мялуматарра тувра, хъа артистари чпи гъуху сумчрарикан, концертарикан видеойирра ирчра.

Жикъиди кIуруш, гъи Инстаграмдиъ чпин страничкйир адру касар сар-кьюрра имдар. Гьаруриз чан хусуси страничкйир ашра, саспи касари, мисалназ, кIул’ди сумчрарикан вуйи видеойир ясана жюрбежюр артистар уч дапIнайи страничкйирра тешкил апIура. Гъи узуз йиз макьалайиъ табасаран халкьдин мяълийир апIру вари устадар уч дапIнайи страничкайин тешкилатчи Насир Сефировдикан пуз ккундузуз. Дугъу гьамусяаьт Москва шагьриъ контракт саягъниинди ватандиз гъуллугъ апIура. Амма, гъагъи ляхниъ ашра, Насири улихьна артистарихъди ккебгъу чан ляхин дипрадар.

«Му ляхин рягьятуб ву кIури, хиял шулу. Гьамусяаьт узу военный ляхниъ айиган, думу тамам апIуз затра хъуркьрадарзу. Кюмекчира адарзуз. Артистари чпин видеойир узухьинди хътаиган, узу дурар страничка-йизди ирчуз кьан гъапIиш, дурари узкан гиран апIуру, амма йиз гъавриъ ахъуз ккундар. Ляхниъ суткайин арайиъ дежурство гъабхбан кьяляхъ, узуз фукьан гъагъиди вушра, гьяракатниинди артистарин видеойир страничкайиъ ирчуз чалишмиш шулаза»,

– кIура жигьили.

Гьамусяаьт Насири тешкил дапIнайи, артистарихъди аьлакьалу страничкайиз саки 40 агъзурихьна инсанари подписка дапIна. Дурарин кьадар йигълан-йигъаз хъанара артухъ шула. Насирин гафариинди, подписчикарин варитIан аьхю аьрза, бязи артистари апIурайи мяълийир фонограммайиинди апIурайивалихъди аьлакьалу ву.

Гележегдин планарикан улхури, Насир Сефировди мялум гъапIганси, дугъаз ихь халкьдин машгьур артист Эльмира Ханкишиевайин продюсер хьуз ккунди а. Дугъу багарихьди гьадму артистдин концерт тешкил апIувалра пландик кипна.
Гъит, гележег хъайи гьамцдар жюрбежюр планар тешкил ва тамам апIру ихь жигьилариз хъанара артухъ кьувват туври.