21-пи декабриъ «Дагестанская правда» редакцияйин конференцйир гъахру залиъ Дагъустан Республикайин тикилишчивалинна архитектурайин ва ЖКХ-йин министр Артур Сулейманов республикайин журналистарихъди гюрюшмиш гъахьну. Пресс-конференция 2022-пи йисандин натижйир йивбаз ва 2023-пи йисандин планариз бахш дапIнайиб вуйи.

 

Серенжем ачмиш апIури, минис-три къайд гъапIганси, республикайин тикилишчивалин министерство гьамусяаьт уьмриз кечирмиш апIурайи 3 милли проектариъ ва 9 гьюкуматдин программйириъ иштирак шула.

«Гьаму проектариъ ва программйириъ иштирак шули, пландиинди улупнайиганси, саки вари ляхнар вахтниинди тамам апIуз чалишмиш шулача. Ццийин йисан варитIан заан натижйир «Деъру хал-йишв» республикайин проектдиъ рякъюра. Му проектдин пландиъ улупнайибтIан артухъ яшамиш шлу хулар тикмиш дапIна. Йисандин аьхириз дидин кьадар 1 0355,0 агъзур квадратдин метр хьибди.

Мидланра гъайри, пуб лазим вуки, Урусатдин регионарин арайиъ 1-пи группайин инвалидариз яшамиш шлу хулар масу гъадагъуз субсидйир жюрейиинди дакьатарин кюмек апIурайиб анжагъ саб Дагъустан Республика ву.

Гьаму йисан республикайиъ му категорияйиз дахил шулайи 114 хизандигъна 300 миллион манат пай гъапIну. Хъа ццийин 1-пи январиз нубатнахъ дийигънайи касарин кьадар 22 агъзурна 323 кас вуйи. Гьадрарикан 16 789 хизан инвалид веледар айидар ву.

Пуз ккундузузки, му программа кечирмиш апIуз жара апIурайи дакьатарин кьадар гьар йисан дигиш шула. Дигиш хьувал региондиъ масу туврайи хуларин квадратдин метрин кьиматнакан асиллу ву.

Мидланра гъайри, нубатнахъ дийгънайи касар чпин нубат филан хъубкьраш лигбан ва гъабхурайи ляхнин марццивал уларикк хьпан бадали, Дагъустандинна Урасатдин тикилишчивалин министерствйири сатIиди вуйи электрондин портал дюзмиш дапIна, ва думу фици либхураш ахтармиш апIбан бадали, ляхникра кипна», – кIура министри.

Журналистарихъди вуйи гюрюшдиъ республикайин тикилишчивалин цирклин гьарсаб терефнакан ва уьмриз кечирмиш апIурайи программйирикан министри жа-жаради ктибтнийи.

Артур Сулеймановди мялумат гъапIганси, «Шагьрин ара гъулайвализ хпан гьякьнаан» проектдин дахилнаъди цци республикайиъ 179, гьадму гьисабнаан 62 гизаф мертебйирин, хуларин гьяятар ва 117 жямяаьтлугъ йишвар рас дапIна. Яна республикайин 2 миллион агьалйириз рягьятвал гъадабгъуз шлу йишвар тешкил дапIна. «2020-пи йисхъан ццийин йисазкьан му проектдин дахилнаъди республикайиъ 660-кьан гизаф мертебйирин хуларин гьяятар рас гъапIну. Гъюру йисаз, гизаф мертебйирин хуларин гьяятарра ва жямяаьтлугъ йишварра кади, 142 объект рас апIуз планламиш дапIна», – гъапну дугъу.

Образованиейин цирклиъ яратмиш апIурайи объектариканра министри мялуматар тувнийи мялуматар.
Дугъу къайд гъапIганси, образованиейин объектар тикмиш апIбаан цци Дагъустан Республика Урусатдин регионарикан варитIан улихь хьа.

«Гъябгъюрайи йисан «Демография» ва «Образование» милли проектарин ва республикайин инвестицйирин программйирин кюмекниинди Дагъустандиъ 158 образованиейин объектар тикмиш апIбан ляхнар тамам апIуз хъюгъну. Гьаму объектарикан 40 агъзурна 93 баяр-шубариз дусру йи-швар айи 103 мектеб ва 7888 бицIириз йишвар айи 55 бицIидарин багъар ву.

«Образование» милли проектдиъди уьмриз кечирмиш апIурайи «Гьаму деврин мектеб» региондин проектдин дахилнаъди 2022-пи йисан республикайиъ 23 агъзурна 518 баяр-шубар дусру йишвар айи 50 мектебарин проектдинна тешкиллувалин ляхнар ккергъна. Читинваларра алалахьри адар, гьаци вушра ляхин пландиинди тамам апIура.

Мисал вуди гъадабгъиш, магьа 2020-пи йисан республикайиъ 1 миллиардна 53 миллион манат харж дапIнайи образованиейин 3 объект ачмиш гъапIну. 2021-пи йисан 5 миллиардна 205 миллион манат харж гъапIу 32 образованиейин объектар, хъа цци кIуруш, 7 миллиардна 181 миллион манат жара гъапIу 42 образованиейин идарйир тикмиш дапIну, дурари ляхин апIуз хъюгъна.
Гъюру йисан ачмиш апIуз планламиш дапIнайи образованиейин идар-йириканра дарпиди гъитуз шулдар. 2023-пи йисан республикайиъ 46 объект ляхник кирчуз планламиш дапIна. Дурар тикмиш апIуз удучIвурайи дакьатарин кьадар 16 миллиардна 500 миллион манат ву», – аьлава гъапIну Артур Сулеймановди.