Дадаси багьалур

 

 

Веледар тербияламиш апIувал думукьан гьии ляхин дар, хъа жарадарин бицIидар тербияламиш апIувал – му аьхю жавабдарвалра ву. Амма Фарида Шихялиевайи мидкан фикир апIурадар. БицIидарин багъдиъ айи гьарсар бицIирихьна думу жвуван веледдихьнаси янашмиш шула. Дугъан ачухъ ва гьаммишан разиди вуйи машнан кIалбар, ужуб гаф, мани хилар Гъвандикк гъулан хайлин бицIидариз багъри дадайиндарси гъахьну.

Фарида Шихялиева бицIидарин багъдиъ тербиячиди лихури, 30 йис шула. Му вахтнан арайиъ дугъу 500-дихьна бицIидариз ужуб тербия тувну.

«Фарида бажи сабурлур, ужуб хасият хъайир, кIваъ рягьим айир, кюмекнан хил гьачIабккрур, бицIидарин гъайгъушнаъ шлур, ляхин ва бицIидар ккунир ву. Дугъу гьарсар бицIирин кIвахьна чан хусуси рякъ гъабгну. Гьаддиз думу, абйир-бабаризси, вари бицIидаризра ккунду», – кIура Гъвандикк гъулан бицIидарин багъдин заведующий Радмила Рамазановайи.