Магьа сабсан йис ихь уьмриан тарихдиз гъубшну. Му йис ухьуз гизаф гъагъиб, дердар-хажалатар айиб гъабхьну, фицики йисандин эвелиъ ккебгъу хусуси метлеб айи дявдин операцияйиъ, ватандин улихь чпин буржи тамам апIури, ихь гизаф баяри чпин жанар фида гъапIну, абйир-бабарин, хизанарин ва веледарин кIваъ гьаммишанлугъдиз вуди аьхю гъам ипну. Дурар, ихь гъийин Игитар, гьаммишандиз халкьдин юкIвариъ гъузди, шаирари дурариз чпин эсерар бахш апIиди, дурарин ччвурар гъизилин гьярфариинди тарихдиъ дикIиди…
Хъа гьяйиф, вахт кьяляхъ апIуз шлуб дар. Йигъахъди йигъ, йисахъди йис гъябгъюри, уьмрин чарх зат яваш дарди илтIибкIура.
ЦIийи 2023-пи йисра магьа ихь уьмриъ убчIвна.
Гъит думу ягъурлуб, саламатвал, хушбахтвал, мублагъвал хъайиб ибшри! Гъит ЦIийи йис гьарсаб хизандиз аьхю шадвалар ва ужувлар хъади гъюри, вари харжиб ва гъалаб кипруб ккудубшу йисаъ гъубзну, улубкьнайи йисан варидарин кIваъ айи аку хиялар, умудар кIулиз удучIври!
Я, Аллагь, уьлкйирин арайиъ мясляаьт, дюн’яйиъ ислягьвал дубхьну, дявдин женгариъ айи баяр шлубкьан ухди, сагъ-саламатди чпин хизанарихьна кьяляхъ хъадакну гъюри!
«Табасарандин нурар» газатдин коллектив
