Февралин 1-пи йигъан Табасаран райондин гимназияйиъ ва Хючнаарин 2-пи нумрайин мектебдин заан классариъ урхурайи баяр-шубар Урусатди гъабхурайи хусуси метлеб айи дявдин операцияйин иштиракчи Юсуф Аьлимягьямедовдихъди гюрюшмиш гъахьну.

 

 

Улихьна Юсуф Аьлимягьямедов Табасаран райондин администрация-йин Жигьиларин центрин пишекарди лихурайи. Думу, чан ляхниъ аргъаж шулайи наслариз ватанпервервалин тербия туври, райондин жямяаьтлугъ уьмриъ жанлуди иштирак шули гъахьну. Урусатди СВО мялум гъапIу садпи йигъариланмина Ватандин маракьар уьрхюри, дявдин женгариз гъягъюз кьаст дапIнайи. Гъубшу йисан 24-пи октябриъ бегьем дару мобилизацияйин дахилнаъди чан хушниинди республикайин военный комиссариатдин сборный пунктназ гъушнийи. СацIиб вахтнан арайиъ гьязурлугвал гъабхбан кьяляхъ, Юсуф Аьлимягьямедов СВО-йин зонайиъ саперди лихура.

Гьамусяаьт думу жикъи вахтнан отпускдиз дуфна. Мектебарин заан классариъ урхурайидари дугъахъди гюрюшмиш хьуз ккуниваликан гъапнийи. Юсуфди дишлади чан разивал улупну, фицики жигьиларихъди вуйи гюрюшар, сюгьбатар дугъаз гьаммишан кьабулди шуйи.

Гюрюш райондин жигьиларин ляхнариз лигру центрин директор Руслан Керимовди ачмиш гъапIнийи ва Юсуф Аьлимягьямедовдиз гаф тувнийи.

Баяр-шубар дявдин женгарин иштиракчийин сюгьбатнахъ дикъатлуди хъпехънийи ва дугъаз хайлин суалар тувнийи. Юсуф Аьлимягьямедовди гьамусяаьт Ватандин маракьар уьрхюрайидарин яшайишдикан, Урусатдин эскрарин гьунарарикан, чаз сабпи ражари дявдин табшуругъ тувган чан кIван гьиссарикан ктибтнийи. «Тарихдин вари деврариъ уьлкейин, гьюкуматдин милли маракьар жилари уьрхюри гъахьну. Думу ихь гирами буржи ву», — гъапну Юсуф Аьлимягьямедовди.