Улихьна вахтариси дарди, аьхиримжи йисари ихь халкьдин вакилари спортдин жюрбежюр жюрйириан заан хъуркьувалар гъазанмиш апIбан дюшюшар йигълан-йигъаз артухъ шула. Халкьдиз чан кIубан баярикан, дурари улупурайи гьунарарикан аьгъяди ккунду, гьаз гъапиш жвуван ватанагьли урхбаъ, ляхниъ, спортдиъ улихь гъягъруган, кIваз шадвалин , утканвалин гьиссар гъюру, дугъу гъазанмиш гъапIу хъуркьуваларик жвуван пайра кайиганси гьебгъру.

 

Нубатнан ражну мицистар шадвалин, утканвалин гьиссар уягъ гъапIур Хючна гъулан агьали, гьамусяаьт Ростов шагьриъ яшамиш шулайи Камалудин Ибрагьимов ву.
Камалудин Ибрагьимов 2011-пи йисан 15-пи апрелиъ Мягьячгъала шагьриъ бабкан гъахьну. СацIиб вахтналан дурарин хизан Хючна гъулаз гъафну. Камалудинди Хючнаарин сабпи нумрайин лицейдиъ кьюбпи класс ккудубкIбалан кьяляхъ, дурарин хизан яшамиш хьуз Ростов шагьриз гъубшну. Гьамусяаьт Камалудинди Ростовдиъ айи 67 -пи нумрайин мектебдин 5-пи классдиъ урхура.
Дугъу спортдихьна вуйи сабпи гамар алдагъуз Хючнаарин сабпи нумрайин ДСЮШ-диъ юкьяр дисбан спортдилан ккебгъну.

2019-пи йисхъан мина Камалудинди Ростовдиъ айи олимпиадйириз спортсменар гьязур апIру 8-пи нумрайин спортдин мектебдиъ гьязурлугар гъахури гъахьну. Дугъан тренер чан адаш, юкьяр дисбан спортдиан мастер Загалав Ибрагьимов ву.

Гьаму улихьна йигъари Ростов шагьриъ юкьяр дисбан спортдиан 44 кило гъагъ айи спортсменарин арайиъ кIули гъубшу турнириъ Камалудин сабпи йишваз лайикь гъахьну. Мицдар хъуркьувалар Камалудиндин хайлин а. Дугъаз айи дипломарин , грамотйирин ва медаларин кьадар аьхюб ву. Талитариз гьязур хьуз спортсменариз хайлин дакьатарра лазим шулу. Дициб кюмек Камалудиндиз чан абйир-бабари апIуру. Чпин балин гьунариин дурарра разиди ву.

Ухьу жигьил спортсмен Камалудиндиз спортдиъ хъанара заан хъуркьувалар ккун апIурахьа. Гъит ихь жигьиларин арайиъ мицдар дирбаш спортсменар артухъ ишри.