Каспийскдиъ «Анжи Арена» стадиондин багахь Дагъустандиан вуйи сенатор Сулейман Керимовдин кюмекниинди, аьзарлу бицIидар сагъ апIру центр ачмиш гъапIну. Душваъ духтрари бицIидарин жюрбежюр уьзрар пулсузди сагъ апIуз кюмек тувди. Багарихьди гьациб центр Дербентдиъра ачмиш апIбанди ву.

 

Центрин кIулиъ айи духтир Уьмар Уьмочевди къайд гъапIганси, душваъ бицIидарин церебральный паралич уьзур кайи бицIидариз кюмек апIиди. «Центриз думу уьзриан лицуз даршлу ясана лап гъагъиди, коляскйирин кюмекниинди саб йишвлан тмуну йишв’ина гъягъюрайи 1 йислан 18 йис’ина яшар вуйи бицIидар кьабул апIиди. Духтрар реабилитацияйин ляхин гъабхуз хъюгъна. СатIиди 10 бицIир кьабул апIуз шулу. Дурарихъди жюрбежюр духт-рари, мялимари, логопедари, психологари ляхин гъабхура. Аьзарлу бицIир айи хизандихьан гьамина илтIикIуз шулу. Учухьна сагъламвал мюгькам апIуз гъюрударин ккунидарин кьадар аьхюб шлувалиин умудлу вуза, бицIидар нубатнахъди кьабул апIидича», — гъапну дугъу.

Центрин тешкилатчйирикан сар вуйи Марианна Мягьямедовайин гафариинди, душваъ 24 гъуллугъчийи ляхин апIиди. «Дагъустандиъ роботарин технологйирин авадлугъари сабпи ражари ляхин апIуз хъюгъна. Улихьди аьзарлу бицIидар хъайи абйир-бабар Урусатдин аьхю шагьрариз гъягъюйи. Гьамус гьадму шагьрариъ тамам апIру гъуллугъар ухьухьра гьуркIуз адагъуз шулу. Йисандин арайиъ 500-600 бицIир кьабул апIуз мумкинвал шул кIури, умуд киврача»-къайд гъапIну Марианна Мягьяммедовайи.