Урусат
Нугъатар гизаф айи саб ватан,
Авуъ мухликьат халкьар.
Первердигари тувнахьуз ватан,
Ишричву бахтлу халкьар.
Текрар бенд
Дуствалин халкьариз ихь саламар,
Мяълира мани, ширин.
Урусатси багъри уьлке адар,
Марцци юрд хияларин.
АпIураза увкан ширин мяъли,
Ужуб вуйган яшайиш.
Дагъдин кIакIар, дюзенар успагьи
Халачйириз ву накьиш.
Текрар бенд
Урусатдиинди вуйихь дамагъ,
Насларин юрд кIваз ккуни
Вува ватан уларин акв, даягъ,
Кюкдихъ хъайи юрд багъри.
Текрар бенд
Зиихъ гъурху шиир-мяъли, ухьуз варидариз мялум духьнайи Урусатдин Игит Мягьяммад Нурбагьяндовдиз бахш вуйи, Москвайиъ удубчIву «Чвйир, ляхин апIинай!» кIуру китабдиъ чап дапIнайиб ву. Гъира Мягьяммад Нурбагьяндовдин игитваликан вари дюн’яйи кIура, ва гъийин заманйириъра, игит Мягьяммаддиз барабар вуйи игитар артухъ хьуз гьяйиф…
Игит Мягьяммаддин дирбаш’вали, ухьуз уьмрариъ гьахъри шлу пчIу бегьемсуз жигьиларин (гъи дицисдарин кьадарра а) юкIвар али йишвлан иришвурашул, хъа гьюрматсузди жилиин али хайлин бегьемсузариканра игитар шлуб дарда. Халис ИГИТ – тербия гъадабгъу ва гъахи ругар ккунирикан шулу. Ва кьюб улин улихь гюлле утIукьнайиб гъябкъю жигьили гъапи шубуб гафнан «ПIАКЬ» вари дюн’яйиз гъеебхьну, ва Мягьяммад Нурбагьяндовдин игитвал, жилин зиин аликьан вари миллетарин намуслу ва халис жигьиларин рягьимлу юкIвариъ гьаммишандиз нумунади гъубзди.
Амма гъи ихь уларихь, гьюкуматарин сиясат женгариъ ругарилан гъушу эскраригъ игитар артухъ хьуб гьяйиф… Узу, женгариъ талаф гъапIу веледар-эскрарин дердагьли абйир-бабарихъди ишураза. Дурариз сабур тув, жан Аллагь!
Гьюрматлу абйир-бабар, гъахи аку ругарилан гъушу ичв игит веледарин гунгьарин аьфи апIри ва намуслу ччвурар фикирнаъди, вари халкьарин хизанариъ аьхю шулайи наслариз – Ватан уьбхюрайидарин йигъ кIваина хури, жандин сагъ’валар, юкIвариъ шадвалар артухъ хьпахъди, вари дюн’яйиъ ислягьвал, инсанвал ва намуслувал хьуб ккун апIураза.
