Февралин 21-диъ Дагъустан Республикайин писателарин союздин председатель Мягьямед Аьгьмедов кечмиш гъахьну.
Мягьямед Аьгьмедович Аьгьмедов 1955-пи йисан 13-пи ноябриъ ДАССР-ин Гуниб райондин Гонода гъулаъ бабкан гъахьну. 1974 – 1979-пи йисари дугъу А.М.Горькийдин ччвурнахъ хъайи литературайин институтдиъ урхури гъахьну. 1984-пи йисхъан мина СССР-ин писателарин союздин вакил ву. Мягьямед Аьгьмедовдин эсерар «Литературайин газат», «Литературайин Урусат», «Октябрь», «Ихь деврин агьли» ва «Халкьарин дуствал» машгьур газатариъ ва журналариъ чап апIури гъахьну. Дугъан хайлин шиърар ва эсерар урус ва милли чIалариз таржума дапIна.
Мягьямед Аьгьмедович 1979-пи йисхъан 2004-пи йисазкьан Дагъустандин китабарин чапханайин редакторди, 2004-пи йисхъан Дагъустандин писателарин союздин председательди гъилихнийи. Думу 2018-пи йисхъан мина Урусатдин писателарин союздин секретарь ва Правлениейин вакилра вуйи.
2005-пи йисан М.Аь.Аьгьмедов, хайлин йисари гъабхурайи баркаллу зегьметназ ва дагъустандин поэзия артмиш апIбаъ гъадагъурайи хъуркьувалариз лигну, Дагъустандин Халкьдин шаир ччвур тувбиинди лишанлу гъапIну. 2006-пи йисан М.Аьгьмедовдиз «Сюгьрин сяаьт» шиърарин китаб бикIбаз Урусатдин литературайин аьхю премия тувнийи, хъа 2012-пи йисан аьхиримжи йисарин шиърар ва урус классикарин поэзия авар чIалназ таржума апIувализ лигну, думу Дельвигдин ччвурнахъ хъайи литературайин премияйин сагьиб гъахьнийи.
– Аьхю хажалат кIваъ ади, Дагъустандин халкьдин шаир, Дагъустандин писателарин Союздин Правлениейин председатель М. Аь. Аьгьмедов уьмриан гъягъюваликан мялум апIураза.
Му дагъустандин вари милли литературйиризси, урусат литературайизра аьхю бедбахтвал ву, фицики Мягьямед Аьгьмедов урус дагъустан литературайин, гьадму саб вахтна урус литературайин аку ва ягъал хяд вуди гъахьну.
Мидланра савайи, Расул Гьямзатовдин кьяляхъ Дагъустандин писателарин Союздиз регьбервал туву дугъу дагъустан литературайин тахт мюгькамди гъюбхну, милли литературйирин артмиш, валихъ жафа гъизигну. Табасаран литературайихьна дугъан рафтар асасдар вуйи.
Мягьямед Аьгьмедов иштирак дархьи ихь литературайин саб мяракара шулдайи, ихь шаирарихьна вуйи дугъан гьюрмат аьхюб вуйи.
Учуз, дугъан ляхнин юлдшариз, думу жавабдар руководителра, юкIв убгру дустра, ич йирфарихъ хъайи мюгькам дагъра вуйчуз, – гъапнийи «Дагъустан дишагьли»журналин редактор, РД- йин писателарин Союздин табасаран секцияйин регьбер Сувайнат Кюребеговайи.
