Улихьна йигъари Мягьячгъала шагьрин Ленинкент гъулаъ ММА жюрейин спортдиан республикайин турнир кIули гъубшну.

 

 

Думу талитариъ Дагъустандин вари пIипIариан спортсменар иштирак гъахьну. Турнирин 60 килограмм гъа-гъишин айи спортсменарин арайиъ иштирак гъахьи ихь ватанагьли, ТIаттил гъул’ан вуйи, 15 йисандин яшариъ айи Ислам Мусаев 1-пи йишван сагьиб гъахьну. Ислам чан 10 йис гъабхьихъантина Хючна гъулаъ бицIидар спортдихъди вердиш апIурайи Аьгьмед Аьлиевдин хиликкди гьаму жюрейин спортдиин машгъул духьнайир ву.

«Сабпи ражари узу Мартин Сефербеговди тешкил гъапIу турнириъ иштирак гъахьунза. Гьаддихъанмина жюрбежюр дережйирин республикайин турнирариъ иштирак шули, гъалибвалин йишварра гъадагъури гъахьунза. Талитназ удучIвайиз улихьна узухъди кчIихуз удучIвурайириз ва дугъан тренерин гьунарариз фикир туври, дурарин зяиф йишвар агури, гьадму жюрейиинди гъалиб хьуз чалишмиш шулаза. ИкибаштIан, жвув гьязур хьуваликанра хайлинуб асиллу ву», – къайд гъапIну спортсменди.