2022-пи йисан 24-пи февралиъ гвачIнинган Урусатдин Президент Владимир Путин уьлкейин ватандашарихьна илтIикIнийи ва Украинайиъ дявдин операция ккебгъбан метлебарикан гъапнийи. Думуган гизафдари, урусатдин кьушмари нацистарин гьюкум терг дапIну, гъалибвал гъадабгъну, дявдин операция саб-кьюб вазлилан ккудубкIуру кIури, фикир апIурайи. Амма дявдин операция гъира давам шули ими.
Улихьна йигъари узу Каспийск шагьриъ яшамиш шулайи, Украинайиъ гъабхурайи хусуси метлеб айи дявдин операцияйиъ гъакIи ихь ватанагьли Аьшурбег Нажмудинович Мягьямедовдин дада Багъдагюл Мягьямедовайихъди пашман сюгьбат гъубхунза.
«Советарин Союздин замана имиди йиз жилир, чан урхуб ккудубкIбалан кьяляхъ, направлениейиинди ляхин апIуз ригъ алабхъру терефнан Украинайиз гьаънийи. Думуган кьюд йисаъ айи байра (Аьшурбег) хъади Украинайиз удучIвну гъушнийча. Гьаддиз Украинайин инсанарихъди ужуди танишди вуза. Учу яшамиш шулайи йишваъ гьадмуганра Советарин халкьдихьна даккнишин айи. Душваъ ургуд йисан яшамиш гъахьнийча. Узу жигьил вахтнахъанмина Кьур’ан урхру дишали вуза, узуз душваъ яшамиш хьуз читинди вуйзуз. Украинайиъ гьаммишан ипIурайиб силин йикк ву, йикк ктру хураг ипIури, ургуд йис гъабхьнийиз. Хъасин хизандихъди Мягьячгъалайиз удучIвну гъафнийча.
Учуз шубур бай айчуз. Йиз сарпи бали Аьшурбегу Карачаево-Черкесияйиъ контрактдиинди армия-йиъ гъуллугъ апIурайи. Февралин 18-пи йигъан ихь кьушмарин дестейин дахилнаъди думу Украинайиъ дявдин операция ккебгъру йишваз гъушнийи. Гьадму вахтназ дугъуна чан хпири кьюр риш тербияламиш апIурайи, хъа хпир шубурпи велед хуз гъагъдиъ айи. Йиз бай СВО-йиз душнайивализ лигну, хъа швушваз бицIир хьайиз цIиб вахт ккимиди узу дурарихьна худлариз хъайивал апIуз гъушнийза. Дявдин операция ккебгъну саб ваз хьайиз, йиз бай гъакIну. Узуз думу чIуру хабар ашкар гъапIундайи, имбудариз пашман хабрикан деебхьнайи. Сад йигъан йиз кьюрпи бай узу Дагъустандиз хъади гъягъюз гъафнийи. «Жан бай, уву гьаз гъафунва, узу сабан гьамушваъ гъузуз ккайза», – гъапнийза дугъаз. Бали, Аьшурбеган хизанра хъади гъягъюрхьа, гъапнийи. Думу дукIнайиваликан узуз Мягьячгъалайиз гъафиган аьгъю гъабхьунзуз.
Аьшурбег гизаф дирбаш бай вуйи. БицIи вахтнахъанмина спортдиин машгъул духьнайи дугъан ужудар хъуркьувалар айи. Мектебдин сабпи классдиз гъягъяйиз, думу спортдин мектебдиз гъягъюз хъюгънийи. БицIи бай хабахъди, кьюрид аьхюну баяр каратейиз хъади гъягъюри шуйза. Кьюд йисан каратейиин машгъул гъахьну, хъа гьамрарин дирбаш’вал гъябкъиган, тренери дурар греко-римский жюрейиинди кчIихбариз гьауз гъядягъну. Байвахтнахъанмина республикайин гъирагъдиъ айи шагьрариз талитариз гъягъюри, дугъу гьаммишан сабпи йишвар гъадагъури гъахьну. «Узу ужуди кчIихуз хъюгъбан бадали, узуз иццру дапIну ккунду, узуз иццру дарапIди узухъди талитнаъ айириз йивуз шулдарзухьан», – кIури шуйи Аьшурбегу.
Узу, кчихбар диндиинди гьярамнан ляхнар ву кIури, баяр спортдихъан хътаънийза. Сифте Аьшурбег Мягьячгъалайиъ Росгвардияйиъ лихури гъахьну. Гьадлин думу Карачаево-Черкесияйиз гьаъну ва душваъ контрактдиинди лихуз хъюгъну. Хъа, баяр аьхю гъахьиган, зегьметнан рякъ чпи ктабгънушра, военный ляхниз бай гъягъюз ихтияр тувувал йиз тахсирси гьисаб апIураза
Гьарсар бабаз чан велед ширин ву, хъа йиз Аьшурбег гьамци йикIур кIури, хиялкьан кIваз гъюрдайиз. Думу дирбашур вуйи. Кьюрднукьан мани штухьди жикIрур дайи, бицIидихъанмина вердиш дапIнайи мюгькам сагъ’вал хъайир вуйи. Чаз кьабулди вуйи ришра швушвди духну, дугъкан ужуб хизандин эйси духьнайи. Гьяйиф, думу ухди уьмриан гъягъювал. Учв СВО-йиз гъягъруган, думу чан шубар уз’ина ва чан кьюрпи гъардш Аьлибегдиина аманат дапIну гъушнийи. Аьшурбегаз чан жикъи уьмрин арайиъ сикинвал фу вуш аьгъю гъабхьундар. Дугъаз наана дих апIурушра, кюмек апIуз, сар-сарикан гиран дубхьнайидар албагуз дих апIури шуйи», – пашманди ктибтура дадайи.
Дердери юкIв убгурайи Багъдагюл Мягьямедовайи чан баликан хайлин ихтилатар гъапIнийи. Хъа чан веледдин майит дибрихъди гизаф вахт гъябгъювал дугъаз варитIан гъагъиди алабхъну. Инсан гъакIну кIури хабар гъабхьиган, арайиъ майит ади ккунду. Майит адруган, белки, думу чIивиди имишул кIури, аьхиримжи умуд ктабтIуз ккун шулдар. Хъа дугъахъди женгнаъ айи баярихьан гьерхиган, дурари гьамци гъапну: «Николаевский райондин Комсомольск поселокдиъ ич дестейи женгар гъахурайи. Мартдин 14-пи йигъан сяаьт 11-диъ учухьинди душмандин терефнаан минйир гатIахьуз хъюгъну. Эскрар гьарсар чпихьан шлуси жин гъахьнийи, Аьшурбегна жара эскер окопдиъ айи. Дурар айи окопдиъра мина гъутIубкIнийи ва цIа алабхънийи. ЦIа ктIубшвунча, амма йивбар сикин шуладайи, гьаддиз гъи-йиху эскрарин майтар гьадму окопдиъ гъузну», – ктибтну Аьшурбегахъди женгнаъ гъахьи эскри чпин командирариз. Майит вахтниинди женгар гъягъюрайи йишв’ан адабгъуз гъабхьундар.
Жигьилин майит абгури, Мягьямедоварин хизанди, волонтерари, дугъан дявдин частнан кIулиъ айидари хайлин зегьмет гъизигну. Аьхирки, августдин вазлиъ дурариз Ростовдиан дих гъапIну ва, Аьшурбеган майит гъибихъну кIури, хабар тувну.
Ислягьвалин кьимат фукьан аьхюб вуш, ихь халкьдиз ужуди аьгъя. Ватан, азадвал, гьякь’вал бадали чан жан фида гъапIу Аьшурбег Мягьямедов аьхиримжи рякъюъ тIауз гизаф халкьар уч гъахьну. Дугъу ва гизаф ихь жигьилари дявдин женгариъ улупу гьунарарикан, дурарин кьягьялваликан гележегдиъра кIваълан гьадрапIбан бадали, гъи ухьу ихь веледариз, худлариз кидибтну ккунду.
