19-пи мартдиъ Дагъустандин образованиейин артмиш’валин институтдиъ кIули гъубшу республикайин «Брейн-ринг» тамшийин финалиъ Табасаран райондиан вуйи, ДО «БицIидарин яратмиш’валарин хал» МБУ-йи тешкил дапIнайи «Аьрифдрар» командайи 2-пи йишв гъазанмиш гъапIну.
Турнириъ республикайин 7 шагьриан ва 37 районариан командйир иштирак гъахьнийи. Гъалибвалин сабпи йишв Мягьячгъала шагьриъ ерлешмиш дубхьнайи республикайин зигьимлу бицIидарин лицей-интернатдин «Три-Эс» командайи гъадабгъну. Хъа шубубпи йишван сагьиб Дербент шагьрин «Илмин дустар» команда гъабхьну.
Хъа Табасаран райондиъ мициб ужуб команда тешкил гъапIдар ДО «БицIидарин яратмиш’валарин хал» МБУ-йин мялимар Мягьямедов Руслан Ражабович, Рашидова Илгьями Наврузялиевна ва Табасаран райондин УО-йин начальникдин заместитель Халидова Эсмира Гьюсейновна ву.
Му турнирикан улхури, Илгьями Рашидовайи къайд гъапIнийи:
«Брейн-ринг» тамши сифте муниципальный, хъасин республикайин этапариъди кIули гъубхнийи. Зональный этапар Бабаюрт, Кьасумкент, Леваши, БотIлих гъулариъ ва Мягьячгъала шагьриъ тешкил гъапIнийи. Душвариан гъядягъю ужударстар 16 командайи республикайин этапдин финалиъ иштирак’вал гъапIну. Душваъ ихь райондиан гъубшу командайи кьюбпи йишв гъадабгъну. Йигълан-йигъаз Табасаран райондин мектебариъ урхурайи баяр-шубарин хъуркьувалар гъазанмиш апIбан дюшюшар артухъ шула.
«Брейн-рингдиъ» иштирак гъахьи «Аьрифдрар» командайин вари баяр-шубар урхбахъ юкIв хъайи, дарсарихьна заан жавабдарвалиинди янашмиш шулайи, гьаммишан жюрбежюр предметариан вуйи конкурсариъ, олимпиадйириъ ва жара талитариъ хъуркьувалар гъазанмиш дапIнайидар ву».
«Брейн-ринг» тамшийиъ гъалиб гъахьи командйиз РД-йин образованиейин ва илимдин министр Ягь’я Бучаевди кьиматлу пешкешариинди, хъа дидин варитIан жанлу иштиракчйир – грамотйириинди лишанлу гъапIнийи.
