Гирами Рамазандин вазлин аьхиримжи йигъари, яна 17-пи апрелиан 20-пи апрелизкьан, Табасаран райондиъ Мюгьяммад пайгъамбрин (с.аь.в.) гирами асарарин выставка кIули гъябгъиди. Дидин гьякьнаан вуйи тешкиллувалин комитетдин сабпи заседание 28-пи мартдиъ Табасаран райондин глава Мягьямед Къурбановдин регьберваликкди кIули гъубшну.

 

 

Заседаниейиъ иштирак гъахьи райондин администрацияйин гъуллугъчйири ва райондин динагьлийири му выставка гъабхбахъди аьла-кьалу месэлйир гьял гъапIну.
Мюгьяммад пайгъамбрин (с.аь.в.) гирами асарарин выставка Хючна гъулаъ Кьалухъ Мирзайин ччвурнахъ хъайи спорткомплексдиъ кIули гъабхуз планламиш дапIна.

Къайд апIуб лазим вуки, му йигъари райондиз Пайгъамбрин (с.аь.в.) 30-тIан артухъ гирами асарар хиди. Гьадму гьисабнаъ дугъан кIулин чIарра, ханжалра, гьацира чав ва дугъан хизанди ишлетмиш апIури гъахьи алатарра а.

«Му серенжем райондиъ гъабхуз ккунди, хайлин йисар вуйич, фицики думу гьарсар мусурман касдин уьмриъ тербияламиш ва уж’вал апIбан терефнаан аьхью роль уйнамиш апIурайи гьядиса ву. Табасаран райондиъ Мюгьяммад пайгъамбрин (с.аь.в.) гирами асарарин выставка гъабхбиинди саб ихь райондин агьалйириз ваъ, хъа вари республикайин агьал-йириз пайгъамбрин (с.аь.в.) гирами асарарихъди таниш хьуз мумкинвал хьибди.

Му серенжемди райондин жямяаьтлугъ уьмриъ чан йишв бисиди, фицики думу йигъари райондиз гьаму выставкайиз лигуз, яна Мюгьяммад пайгъамбрин (с.аь.в.) гирами асарарихъди таниш хьуз, республикайин вари терефариан хайлин инсанар гъиди.Хялар гизаф шлувализ ва ушварин ваз вуйивализ лигну, тешкиллувалин комитетдиз дахил шулайи гьарсар касдиз тялукь табшуругъар тувна. Фицики выставкайиз дуфнайидариз гъудган апIру, ушв гьибтру йишвар улупну ккунду», – гъапну райондин главайи.