3-пи апрелиъ Мягьячгъалайиъ ерлешмиш дубхьнайи пайгъамбар Исайин (аь.в.) ччвурнахъ хъайи Духовный центриъ Табасаран ва Хив районарин агьалйири сатIиди ушв гьибтувал (ифтар) тешкил апIиди. Ихь районариан му серенжемдиъ иштирак хьуз ккунидариз варидиз дина дих апIура.
Къайд апIуб лазим вуки, гьар йисан Рамазандин вазлиъ республикайин гьарсаб муниципалитетди думу Центриъ жа-жаради ушв гьибтбан серенжемар тешкил апIури, цци магьа шубудпи йис ву.
Хив райондин имамарин председатель Шяйбан Салигьовдин гафариинди, серенжемдин программайин дахилнаъди нашидар урхиди, жюрбежюр викторинйир хьиди.
Эгер ифтарик жвуван пай кивуз ккунир аш, жавабдар кас Мансур Везировдин картайин 2202 2018 8031 3644 нумрайиз садакьади пулин дакьатар хътаузра шулу. Уч гъабхьи пулихъ ифтариз дуфнайидариз ушв гьибтуз ипIруб гьязур апIиди.
