Гьаму йигъари Мягьячгъала шагьриъ Анатолий Карповдин ччвурнахъ хъайи шахматарин клубдиъ 9 йислан 17 йис’ина яшар вуйи мектебдиъ урхурайи баяр-шубарин арайиъ урус шашкйириан Дагъустан Республикайин талитар кIули гъушну.
Талитариъ Мягьячгъала, Каспийск, Хасавюрт, Къизилюрт, Буйнагъск шагьрариан ва Табасаран, Бабаюрт, Къизилюрт районариан 46 ученик иштирак гъахьнийи.
Табасаран райондиан му талитариз Ягъдигъ гъулан 1-пи нумрайин мектебдин 4-пи классдиъ урхурайи Альфия Ражабова ва 7-пи классдиъ урхурайи Мадина Гьясанбегова гъушнийи. Му кьюрид шубарра гъябгъюрайи йисан февралин вазлиъ Табасаран райондин бицIидарин яратмишарин хулу шахматарианна шашкйириан тешкил гъапIу турнирин гъалибчйир вуйи.
Республикайин дережайин талитар тялукь яшарин дестйирин арайиъ кIули гъухнийи. Яшар 11 йисазкьан вуйи бицIидарин дестейиъ урус шашкйириан кIули гъушу талитариъ Альфия Ражабовайи шубубпи йишв гъазанмиш гъапIну.
Хъа 17 йисазкьан яшар вуйи шубарин арайиъ кIули гъушу талитариъ Мадина Гьясанбегова сабпи йишваз лайикь гъахьну. Дугъу чахъди финалин талитназ удучIву Къизилюрт шагьриан вуйи риш рягьятди ккагънийи.
Къайд апIуб лазим вуки, республикайин дережайин талитариъ иштирак шули кьюрид шубаринра сабпи раж вушра, Альфияйира, Мадинайира урус шашкйириан Дагъустандин талитариъ гьязурвалин заан натижйир улупну.
Турнирин гъалибчйир РД-йин спортдин ва физический культурайин министерствойин терефнаан тялукь кубокариинди, медалариинди ва дип-ломариинди лишанлу гъапIнийи.
«Дюзди гъапиш, мектебдиъ танафус гъабхьибси, вари урхурайи ученикар спортзализ ва «Точка роста» кабинетдиз шахматар ва шашкйир уйнамиш апIуз жаргъуру. Гьаму йигъари аьхю танафусдиз зенг гъивубси вари бицIидар гьялакди спортзализ гъягъю-райиган, дурарин кьяляхъди узура гъушнийза. Узу ич баяр-шубари аьхю аьшкьниинди шашкйир, шахматар ва теннис уйнамиш апIурайивалиин рази ва мюгьтал гъахьнийза. Гъийин деврин баяр-шубарин столиин уйнамиш апIру тамширихъ юкIв хътар, фицики варидарин хилиъ интернет ва гьадушваъ фтиин вушра машгъул хьуз мумкинвал айи телефонар а. Хъа ич мектебдиъ урхурайидари чпин 10 дакьикьайин вахт гьавайиди гъюдубчIвуз гъитрадайи. Мид’ин рази дархьиди гъузуз шулин!? Ич мектебдиъ гьар йигъ гьаци гъябгъюру.
Урхурайидарин спортдихьна, столиин уйнамиш апIру тамширихьна аьшкь хьуз гъитувал, икибаштIан, физкультурайиан дарсар киврайи мялимарикан асиллу ву. БицIину классариз Аливер Ражабовди, хъа аьхюну классариз Аьли Гьясанбеговди физкультурайин дарсар кивра. Гьаму мялимари кьюрдун вая мархь убгъурайи вахтна баяр-шубар гьяятдиз адауз даршлуган (улихьна йисари ич мектебдиъ спортзалра адайи), урхурайидарихьди классдиъ шашкйир, шахматар уйнамиш апIуз гъитри гъахьнийи. Сабсана далил къайд дарапIди гъитуз шулдар – учв Аьли Гьясанбеговра аьхиримжи 15 йисан райондиъ шашкйириан ва столиин уйнамиш апIру теннисдиан тешкил гъапIу талитариъ гьаммишан сабпи йишван сагьиб шула. Мялим чан ляхин аьгъю ужур пишекар вуйиган, баяр-шубаринра аьшкь артухъ шулу. Гьаци ич мектебдиъ урхурайидари райондиъ Марат Рягьметовдин гьюрматназ шашкйириан ва шахматариан гьар йисан кIули гъахурайи талитариъ ва кьибла Дагъустандин шагьрариъ ва гъулариъ столиин уйнамиш апIру теннисдиан, шашкйириан ва шахматариан тешкил апIру талитариъ гьаммишан сабпи йишвар гъазанмиш апIура», – гъапнийи ич сюгьбатнаъ Ягъдигъ гъулан мектебдин директор Уьсман Мягьямедовди.
Шиклариъ: Урус шашкйириан республикайин талитарин гъалибчи Мадина Гьясанбегова ва 3-пи йишван сагьиб Альфия Ражабова.
