Апрелин 1-пи йигълан 15-дизкьан Хив райондиъ хьадук-ран призывдин кампания кIули гъябгъюра. Райондиъ запасдиъ адру ва федеральный къанундиинди армияйиъ гъуллугъ апIуз буржлу вуйи, 18 йислан 27 йис’ина яшариъ айи жигьилариз гъуллугъназ гъягъюз повесткйир хътаъну.

 

Гьаму йигъари Хив райондиан жара вахтназ улупну адру, военный гъуллугъ гъабхуз шлувал тасдикь дапIнайи ва призывдин комиссияйи гъядягъю 11 жигьил РФ-дин Яракьлу кьувватарин эскервализ кьабул апIиди.
Гьамусяаьт призывникари Хив райондин ЦРБ-йиъ военный гъуллугъназ гъахайиз улихьна вуйи серенжемарин дахилнаъди сагъ’вал къайдайиъ айивал ахтармиш апIура. Райондин призывной комиссияйин вакилари, гьарсар призывникдихъди жа-жаради сюгьбатар дапIну, духтрарин ахтармишарин натижйир, яракьлу кьувватариъ гъуллугъ апIуз гьязур шулайидарин хусуси документар, пишекарвал ва характеристикйир гьисабназ гъадагъну, дурарикан гьарсар касдин гьякьнаан военный гъуллугъназ гьаъбан, армияйиз гъягъювал жара вахтназ гъибтбан вая военный гъуллугъ гъабхбахьан азад апIбан къарар адабгъиди.
Къайд апIуб лазим вуки, ватандин улихь чпин буржи тамам апIуз армияйиз гъахурайи саркьан призывник хусуси метлеб айи дявдин операция гъябгъюрайи йишваз гьаудар.