Гьаму йигъари Мягьячгъала шагьриъ 71-пи нумрайин ккергъбан мектеб — бицIидарин багъдиъ «ВаритIан ужур тербиячи — 2023» республикайин конкурс кIули гъябгъюра.
Конкурсдиъ республикайин 23 райондиан ва 10 шагьриан 34 тербиячи иштирак шула. Конкурсдин кьюб туриъ дидин иштиракчйири чпин бажаранвал, мумкинвалар ва деврин мялуматарин технологйирихъди лихуз аьгъювалин дережа улупиди.
Къайд апIуз ккундузузки, гьаму конкурсдиъ Табасаран райондин ТIаттил гъулан «Радуга» кIуру бицIидарин багъдин тербиячи Гюльназ Пирмягьямедова ва Хив райондин Хив гъулан «Солнышко» бицIидарин багъдин педагог-психолог Эспет Гьяйдарялиева иштирак шула.
Хив райондин образованиейин отделин мектебдиз улихьна вуйи образование-йин месэлйириз лигурайи Наима Аьлимягьямедовайи къайд гъапIганси, Эспет Гьяйдарялиева Хив гъулан бицIидарин багъдиъ лихури, 15 йистIан артухъ ву. Му йисари дугъу учв бажаранлу психологси, бицIидарихъан юкIв убгру тербиячиси, фидакар зегьметкешси улупну. Думу швнуб-саб ражари республикайин ва райондин дережайин жара конкурсариъра иштирак духьна.
Табасаран райондин образованиейин управлениейин мектебдиз улихьна вуйи образованиейин кIулин пишекар Айнисе Маллялиевайин мялуматариинди, гьамусяаьт Гюльназ Пирмягьямедова конкурсдиъ заан натижйир улупури, улихь гъягъюра.
«ВаритIан ужур тербиячи – 2023» конкурсдин райондин дережа 16-пи мартдиъ Дарвагъ гъулан бицIидарин багъдин бинайиинди кIули гъубшнийи. Конкурсдиъ иштирак гъахьидарин арайиъ Гюльназ Пирмягьямедова сабпи йишваз лайикь гъахьну. Дюзди гъапиш, ТIаттил гъулан бицIидарин багъ райондиъ варитIан ужударикан гьисаб апIуз шулу. Дидин кIулиъ айи Марина Аьбдуллаева бажаранвал кайи, ужуб тажруба айи тIалаблу тербиячи ву. Дугъу чан коллективдиканра гьациб марцци ляхин ккун апIура. Коллективдин тербиячйир гьар йисан райондин конкурсариъ ужудар хъуркьувалар улупурайи иштиракчйир ву», – гъапну Айнисе Маллялиевайи ва Гюльназди гъалибвал гъадабгърувалик миж кивну.
Конкурсдиъ иштирак шулайи ихь ватандашариз хъуркьувалар ккун апIурхьа. Хъа, гъалибвал гъадабгъну, ихь республика вари Урусатдин дережайиз адабгъру варитIан ужур тербиячи фуж гъахьнуш, 15-пи апрелиъ мялум хьибди.
