Туристарихъди ляхин апIурайи Урусатдин туроператорари туврайи мялуматариинди, цци ихь уьлкейин регионариан варитIан гизафси туристари Дагъустандиз гъюз планламиш дапIна.

 

 

Статистикайин улупбариинди, сач ихь республикайиз 1 миллионна 500 агъзуртIан артухъ туристар гъафну. Цци думу кьадар кьюб ражарикьан артухъ хьуб мумкин ву. Республикайиъ ужуб табиаьт, гьюл ва ягъал дагълар айивализ лигну, мина гьюлихъ рягьятвал гъадабгъуз, тарихи йишвариз экскурсйириз гъягъюз ва аьдати дару жюрейиинди рягьятвал гъадабгъуз иштагь айи туристар гъюра.
Багарихьди республикайиъ туристар гъюру фасил ачмиш апIиди. Гьаддиз региондин муниципалитетариъ думу фаслихьна гьязур хьпан ляхнар гьяракатниинди кIули гъахура. Кьибла Дагъустандин ужуди туризм артмиш шулайи муниципалитетарин арайиъ Табасаран районра а.

Табасаран райондин администрацияйин физический культурайин, спортдин, жигьиларин ляхнарин ва туризмдин управлениейин кIулиъ айи Низами Агъаризаевдин гафариинди, Табасаран райондиз туристар кьабул апIуз лазим вуйи вари мумкинвалар а.

«Гьамусяаьт райондиъ, туристар кьабул апIуз гьязур шули, хайлин ляхнар кIули гъахура. Мисал вуди гъадабгъиш, улихьнаси, 5-пи апрелиан 8-пи апрелизкьан, Табасаран райондин глава Мягьямед Къурбановра кIулиъ ади, райондиан вуйи делегацияйи Новосибирск шагьриъ халкьарин арайиъ вуйи туризмдин форумдиъ иштирак’вал гъапIну. Думу форумдиъ ихь делегацияйиъ туристар кьабул апIбаъ Табасаран райондиз айи мумкинвалар улупну ва Табасарандиз туристар хъади гъюбан гьякьнаан хайлин туроператорарихъди йикьрарра гъийитIну. Райондиз туристар гъюру фасил ккебгъайиз кIури, кми-кмиди субботникарра кIули гъягъюра.

Мидланра гъайри, пуз ккундузузки, эгер йишвазди гъюз ккунидар гъахьиш, дурар кьабул апIру хулар, гостиницйирра гьязур дапIна. Ургур чвуччвунна сар чуччун гъалайин багахь гьамусяаьт вушра хялар кьабул апIру гакIвлин хулар гьязур дапIна. Багарихьди ГьепIил гъулаъра 50-тIан артухъ хялариз дахъуз йишвар айи гакIвлин хулар ачмиш апIиди. Гьацира Рибчрарин гъвалахъ хъайи гостиницара цци ачмиш апIуз планариъ а. Гьял дапIну ккуни бицIи-бицIи ляхнар гьелелиг гъузна. Багарихьди дурарра аьхирихъна духну, гостиница ачмиш апIуз мумкинвал хьибди», – кIура Низами Агъаризаевди.

Йиз сюгьбатчийи мялум гъапIганси, цци Табасаран райондиъ лап гизаф кьадар туристар гъюбаз ккилигура. Район хялар кьабул апIуз вари терефариан гьязур шула. Дуфнайи туристари уьл ипIру йишварин гьякьнаан улхури, Низами Агъаризаевди къайд гъапIганси, райондиъ айи вари ресторанар, кафйир «сирниккан» ккадаъну, Табасаран райондин артмиш шулайи экономикайик дурари чпин пай кивруганси тялукь ляхин гъабхура.

Ич сюгьбатнан аьхириъ Низами Агъаризаев Табасаран райондин агьал-йирихьна ва райондиз гъюрайи хяларихьна райондин табиаьт уьбхюб, чпи рягьятвал гъадабгъбан кьяляхъ наан вушра хъархъсарин чIвеэр гъидритуб ккун апIури илтIикIнийи.