1-пи майдиъ, Хьадукран ва зегьметнан машкврихъди аьлакьалуди, Дагъустандин Главайи гизаф йисари баркаллу зегьмет зигбаз ва зегьметнаъ хъуркьувалар гъадагъбаз лигну, республикайин саб жерге ватандашариз гьюкуматдин наградйир тувну. Лишанлу гъапIдарин арайиъ ихь ватанагьлийирра айи.

 

 

«Жигьилариз ватанпервервалин тербия тувбак пай кивбаз лигну» Табасаран райондин кIулиъ айи Мягьямед Къурбановдиз Амет-Хан Султандин ччвурнахъ вуйи медаль тувну.
«Региондин кIулиъ айири гьаму наградайиинди сар узу ваъ, вари райондин агьалйир лишанлу гъапIну. Жигьилар лайикьлу ватанперверарди тербияламиш апIбак аьхю яшнан инсанарин ужуб пай ка», – гъапну Мягьямед Къурбановди.

Табасаран райондин М.Т. Юнусовдин ччвурнахъ хъайи Цухтигъарин кьялан мектебдин мялим Аьбдуллагь Ибрагьимовдиз, «Игитвалин зегьмет лигбаз лигну» медаль тувну. Сергей Меликовди, Аьбдулла Ибрагьимов тебрик апIури, дугъу гъизигу 60 йисандин зегьметназ чухсагъул мялум гъапIнийи. «Гъулаъ ужуб совет, мектебдиъ ужур мялим айивал жямяаьтдиз ва наслариз аьхю кюмек ву. Мялимвалин ляхин гьаммишан заан кьимат айиб ву. Гъи ихь Ватандин улихь СВО-йиъ иштирак шулайи дявдин гъуллугъчйириз туву тербияйик мялимдин зегьметра ка. Ухьу варидари мялимдин гьюрмат гьар вахтна дюбхну ккунду», – аьлава гъапIнийи республикайин кIулиъ айири.

«Мялимвалин кесп гьарган юкIв хъайиб вуйиз. БицIидариз аьгъювалар, илим тувуб, дурар тербияламиш апIуб йиз уьмрин кьисмат гъабхьну. Умуд кивраза, бицIидарин юкIвариъ узу кархьу шамари дурариз уьмриъ рягьятди ва инанмиш вуди гамар алдагъуз, ужудар, баркаллу ляхнар кIулиз адагъуз кюмек тувди», – кIура тажрубалу мялимди.

Ибрагьимов Аьбдуллагь Ибрагьимович 1940-пи йисан 28-пи февралиъ Цухтигъ гъулаъ бабкан гъахьну. Гъулан мектеб ккудубкIну, думу сакьюдар йисари М.Дахадаевдин ччвурнахъ хъайи колхоздиъ гъилихну. 1960-1963-пи йисари Совет Армияйин жергйириъ гъуллугъ дапIну, 1964-пи йисан Кафари Осетияйин Хетагуровдин ччвурнахъ хъайи институтдиъ тарихнан факультетдиъ урхуз учIвру. 1970-пи йисан, урхувал ккудубкIну, думу сифте ЗертIларин, хъасин Турфарин, Имшнигъярин мектебариъ, аьхирки багъри гъулаъ мялимди лихуру.
Ич сюгьбатнаъ Цухтигъарин кьялан мектебдин директор Роберт Аьзизовди Аьбдуллагь Ибрагьимовдин ляхниз заан кьимат тувнийи.

«Аьбдулла Ибрагьимо-вичди учуз, жигьил мялимариз, бицIидарихъди дюзди улхуз, дюн’яйиз дурарин улариинди лигуз, гъадагъу аьгъюваларикан мянфяаьт ктабгъуз улупну. Ич коллективдиъ лихурайидарикан сар мялимдиз ктарди, дугъу имбудариз варидариз дарсар кивну. Аьбдуллагь Ибрагьимовдиз гизаф грамотйир, гьадму гьисабнаан Урусатдин Федерацияйин образованиейин министерствойинра, жюрбежюр пешкешар а, думу Дагъустан Республикайин лайикьлу мялим, Урусатдин Федерацияйин Президентдин грантдин сагьиб ву. Дугъан ученикар гъи ихь уьлкейин вари пIипIариъ машгьур духьна. Аьбдуллагь Ибрагьимовдиз ужуб аьхю хизанра а – 9 велед (3 бай ва 6 риш), 24 хтул ва 12 гудул», – ктибтнийи директори.
Газатдин редакция-йин терефнаан Мягьямед Къурбановдиз ва Аьбдуллагь Ибрагьимовдиз халкь бадали зигурайи зегьметнаъ хъана заан хъуркьувалар ккун апIурача.