Майдин 10-пи йигъан Дагъустандин Глава Сергей Меликовди региондин улихь дийигънайи месэлйир гьял апIбаз бахш дапIнайи совещаниейиъ СВО-йин игитарин гьюрмат уьбхбаз асас фикир тувну.
Гъалибвалин Йигъ къайд апIбан дахилнаъди, Сергей Меликовди чан улхбаъ, ветеранариз, СВО-йин иштиракчйириз ва дурарин хизанариз гьюкмин органарин терефнаан айи гьюрматназ чухсагъул мялум гъапIну.
Гъалибвалин Йигъ къайд апIайиз улихь йигъари Дагъустандиъ СВО-йин зонайиъ Ватан бадали чпин уьмур туву дявдин гъуллугъчйир яшамиш шули гъахьи йицIбариинди хуларик гьюрматнан тахтйир керхну. Региондин Главайин гафариинди, акция тешкиллувалин заан дережайиъди кIули гъубшну.
Сергей Меликовди СВО-йин иштиракчйирин гьюрмат уьбхювалин акция июндин 22-пи йигъаз – Гьюрматнан ва пашманвалин йигъ улубкьайизкьан – давам апIурайиваликан мялумат тувнийи. Дугъу мемориалин тахтйир керхну адру хуларик дурар керхуз табшурмиш гъапIнийи.
Майдин йигъариъ Табасаран ва Хив районариъ Ватандин Аьхю дявдин ва СВО-йин иштиракчйирин гьюрмат уьбхбахъди аьлакьалу серенжемар кIули гъушну.
6-пи майдиъ Табасаран райондин 6 мектебдиъ – Гискарин, Ккувлигъарин, Жвул’арин, Куркккарин, ГьепIларин, гьацира Хючнаарин 2-пи нумрайин мектебариъ СВО-йиъ гъийиху иштиракчйириз бахш вуди гьюрматнан тахтйир ачмиш гъапIнийи.
Табасаран райондин глава Мягьямед Къурбанов Хючнаарин 2-пи нумрайин мектебдиъ Фарман Фейзуллаевдиз вуйи гьюрматнан тахта ачмиш апIбан серенжемдиъ иштирак гъахьну. Уьмуми гьисабариинди, гъийин йигъаз райондин мектебариъ СВО-йиъ гъийиху ватанагьлийириз бахш вуди мемориалин 44 тахта ачмиш дапIна.
7-пи майдиъ Ягъдигъ, АхьитI, Мягьрягъ гъуларин мектебарин аьтрафариин Ватандин Аьхю дявдин женгариъ гъийиху гъуландариз-эскрариз бахш вуйи ядиграрра ачмиш гъапIну.
Ядигарар дивбан теклиф Табасаран райондин глава Мягьямед Къурбановдин вуйи. Дугъан теклиф мялимарин коллективари ва гъулан агьалйири лап разивалиинди кьабул гъапIнийи.
Дупну ккундуки, Ягъдигъ гъул’ан Ватандин Аьхю дявдин фротдиз 48 кас гъушнийи, дурарикан 27 кастIан кьяляхъ гъафундайи, хъа АхьтIарин дявдиз гъушу 50 гъуландарикан 20 кастIан кьяляхъ гъафундайи. Мягьрягъ гъул’ан кIуруш, 300-тIан артухъ касар Ватандин Аьхю дявдиз гъушнийи, хъа кьяляхъ анжагъ 60 кастIан гъафундайи. ЦIийиди диву ядиграрик дурарин варидарин ччвурар дидикIна.
***
9-пи майдиъ Хив райондин Лака гъулаъ СВО-йин женгариъ гъакIи Ферзяли Ферзялиевдиз бахш дапIнайи гьюрматнан тахта ачмиш гъапIну.
Ватандин Аьхю дявдиъ Гъалибвал гъадабгъну, 78 йис тамам гъабхьи йигъан Хив райондин глава Ярмет Ярметов Урусатдин Яракьлу кьувватарин завун десантдин дявдин кьушмар гьязур апIбан начальник, генерал-майор Арсен Рягьмановдихъди, меценат Альберт Эмирагъаевдихъди, Хив райондин депутарин собраниейин председатель Садикь Исрафиловдихъди ва МВД-йин отделин начальник Камал Гьясановдихъди СВО-йиъ гъийихдарин хизанарихьна гъушну.
Чувекк гъулаъ дурар СВО-йиъ гъакIи десантдинна алжагъбан ротайин отделениейин командир, аьхюну сержант Ремик Салигьовдин хизандихьна, ЦIинитI гъулаъ – Росгвардияйин бицIину сержант Ринад Шагьбазовдин хизандихьна, Ашага АрхитI – пулеметдихъ хъайи Шимердан Султановдин хизандихьна гъушну, Лака гъулаъ 14 йисаъ айи инвалид бай айи Ферзяли Ферзялиевдин хизанарихъди гюрюшмиш гъахьну.
Дурар гьацира Хив гъулаъ СВО-йиъ гъакIи капитан Мислим Мислимовдин хизандиинра улуркьну.
Чпи гъушу гьарсаб хизандиъ Ярмет Ярметовди СВО-йин иштиракчйирин хизанариз айи читинваларикан гьерхри гъахьну. Чпин терефнаан СВО-йин иштиракчйирин хизанарин вакилари, читинвалариз фикир туврайи райондин улихь-кIулихь хьайидариз чухсагъул мялум гъапIну.
Табасаран райондин глава Мягьямед Къурбанов РД-йин халкьдин Собраниейин депутат Алавудин Мирзабалаевдихъди Хючна гъул’ан вуйи, СВО-йиъ гъакIи Фарман Фейзуллаевдин, Заан Ягъдигъ гъулан агьали Асланбег Загьировдин ва Рушв’ин гъулан агьали Аьлим Фейтуллаевдин хизанариин улуркьну.
Табасаран райондин главайи СВО-йин иштракчйирин хизанариз айи читинваларикан гьерхну ва жикъи вахтнан арайиъ дурар гьял апIувал табшурмиш гъапIну.
Гьацира муниципалитетдин кIулиъ айир ва райондиз дуфнайи РД-йин Халкьдин Собраниейин депутат Алавудин Мирзабалаев Пилигъ ва ЦIанитIил гъулариан вуйи хусуси метлеб айи дявдин операцияйиъ иштирак шулайи эскрарин дадйирихъди, хпарихъди гюрюшмиш гъахьну ва дурариз чан терефнаан вари лазим вуйи кюмек апIуз гаф тувну.
