Гъубшу йисан октябрин вазлиъ вари халкьарин арайиъ вуйи боксдин ассоциацияйин директорарин Советди Урусатдин ва Белоруссияйин спорт-сменариз боксдиан вари дюн’яйин талитариъ иштирак хьуз ихтияр тувну. Натижйирира кьаназ чпиз ккилигуз гъитундайи.
Гъябгъюрайи йисан апрелин 30-пи йигълан майдин 14-диз Узбекистандин Ташкент шагьриъ боксдиан вари дюн’яйин 22-пи чемпионат кIули гъубшнийи. Думу талитариъ вари дюн’яйин 107 уьлкейиан 538 спортсмен иштирак гъахьну. Урусатдин боксерарин командайи думу талитариъ кьюб гъизилин ва юкьуб кемшрин медалар гъазанмиш гъапIну. Кьюбиб гъизилин медаларин сагьибар дагъустанлуйир Муслим Гьяжимягьямедов ва Шарабудин Атаев ву.
«Чпин улихь дивнайи метлебарихъ хъуркьбан кIван мюгькамвалин ва цIалцIамди дудубгънайи техникайин кюмекниинди Урусатдин боксерари вари дюн’яйин боксдин чемпионатдиъ гъалибвал гъадабгъну…», – гъибикIну Урусатдин Президент Вдадимир Путинди боксерариз вуйи тебрикнан кагъзариъ.
Чпи багъри ругариин мици яркьуди къаршуламиш апIруваликан спортсменариз хабаркьан адайи. Муслим ва Шарабудин Мягьячгъала шагьрин аэропортдиъ самолетдиан эдеубси, дурар республикайин улихь-кIулихь хьайидари, багахьлуйири, дустари ва машгьур спортсменари кьялаъ тIаънийи.
Къайд апIуб лазим вуки, Дагъустандин спортсменари боксдиан вари дюн’яйин саб чемпионатдиъ сабишв’инди кьюб гъизилин медаль гъадагъури тарихнаъ сабпи раж ву.
Муслим Гьяжимягьямедов улихьна йисарира боксдиан вари дюн’яйин чемпион гъахьир вуйи. Токиойиъ гъабхьи олимпиадайиъ гъизил гъазанмиш апIуз дугъаз сабцIиб кьувват гьубкIундайи. Ташкентдиъ финалиъ италияйин спортсмен Аьзиз Муийдиндиин гъалиб хьувалиинди ихь спортсменди чан чемпионвалин ччвур гъюбхну.
«Му чемпионат лап гъагъиб гъабхьунзуз. Дюзди кIуруш, ликриз зиян дубхьну, шубубпи талитарин кьяляхъ больницайиз гъушнийча. Йишвну даърахди лик сагъ апIури гъахьунча. Узхьан лицуз даршули, баяри больницайиз хабахъди гъахури гъахьунзу. Шубубпи кчIихбарин кьяляхъ, жвув магълуб гъахьиваликан дупну, чемпионатдиан удучIвуз ккайза. Йиз бахтнаанси, лик дюбгъну адайи. Йиккун гурдмар паттар духьнайи. Ликрин вари йиккун гурдмар гьадахьнайиз. Иццрувал гьисс дарапIру дармнар итIури ва рубар йивури гъахьунча. Амма гьаци вушра, рингдиъ алдабгъу гьарсаб гам гъагъиб ва аьзиятнануб шуйзуз. Аллагь кюмек гъахьундайиш, турнириъ узу гъалиб хьидайи», – гъапнийи Муслим Гьяжимягьямедовди.
Шарабудин Атаев му жюрейин аьхю талитариъ иштирак шули сабпи раж ву. Дугъура чан вари кчIихбариъ заан гьязурвал улупнийи.
Дупну ккундуки, чемпионатдиъ ихь боксерарин техникаси, дурарин палатдик кайи ихь уьлкейин асас милли лишнарра варидариз гъяркънийи.
«Гъалибвал гъадабгъну багъри ватандин пайдагъ за апIруган ва багъри ватандин гимн йивруган, кIваз лап хуш шулу. Диди спортсменарик аьлава гьевес кубчIвуз гъитру. Ихь гимндиз ва пайдгъиз учу хайлин вахтна ккилигунча. Жвуван кьяляхъ вари Урусат хъайиганси кьувват гьисс апIуз хъюгъру», – гъапнийи спортсменари.
Шарабудин Атаев ва Муслим Гьяжимягьямедов Дагъустандин Глава Сергей Меликовди, РД-йин Правительствойин кIулиъ айидари ва вари министрари гъалибвалихъди тебрик гъапIнийи ва дурариз пешкеш вуди са-саб жинснан якъар тувну.
