28-пи майиъ Урусатдин Федерацияйиъ уьлкейин сяргьятар уьрхбан гъуллугънан 105 йис тамам хьувал къайд гъапIну. Вари Урусатдиъси, Дагъустандиъра жилиин, гьюлериин ва завариъ уьлкейин сяргьятар уьрхрударин машкврин серенжемар кIули гъушну.

 

 

Урусатдин сяргьятар уьрхру гъуллугъарин машгьур тарих а. Думу гъуллугъар гьаммишан сабпи нубатнаъди душмнихъди вуйи женгназ удучIвура. 1941-пи йисан 22-пи июндиъ СССР-ин ригъ алабхъру терефнаъ сяргьятар уьрхюрайи 83 агъзур эскри фашистарин чапхунчйирин хабарсуз алжагъувал кьабул гъапIнийи.

Ихь уьлкейин сяргьятар дюн’яйиъ варитIан ярхидар ву – 60 агъзур километртIан артухъ. РФ-дин сяргьятарин гъуллугъарин чIатху дестйирикан саб Дагъустандиъ ерлешмиш дубхьна. Думу дестейи жилиин Грузияйихъди, Азербайжандихъди, хъа Каспий гьюлин штуъ Ирандихъди, Туркменистандихъди ва Казахстандихъди вуйи сяргьятар уьрхюра. Гьюлин сяргьятарра кади, Дагъустандиъ 1048 километр сяргьятар а.

Хъа гьамусяаьт варитIан читинди Украинайихъди вуйи сяргьятариин гъуллугъ гъабхурайи эскрариз ву. Урусатдин ва Украинайин сатIи вуйи сяргьятдин манзил 2295 километр ву, гьадму гьисабнаан 321 километр гьюлин ва 1974 километр жилиин али сяргьятар.
Сяргьятчи эскрарин гъуллугънан 105 йис къайд апIбахъди аьлакьалу вуди, узу Крымдиъ сяргьятар уьрхюри гъуллугънаъ айи ихь ватанагьли Зиявудин Мягьямедовдихъди (ччвур дигиш дапIна) гюрюшмиш гъахьунза.
Зиявудин Мягьямедов Каспийск шагьриъ халис табасаран хизандиъ бабкан гъахьну. Ужудар аьгъювалариинди мектеб ккудубкIну, думу Урусатдин ФСБ-йин Калининграддин пограничный институтдик урхуз кучIвну. Институт ккудубкIбалан кьяляхъ, Зиявудин Крымдиз гъуллугъ апIуз гьаъну.

«Крым Республикайиъси, жара йишвариъра гъуллугъ гъабхурайи ФСБ-йин сяргьятар уьрхру управлениейин фунур гъуллугъчийинра вазифа – Урусатдин гьюкуматдин сяргьятар ва уьлкейин экономикайин маракьар уьрхювал ву. Яна уьлкейин аьтрафариина дазуйин къайдйир чIур апIрудар гъюз гъидритувал, уьлкейиз хьади гъюз ихтияр адру ше’ар хуз гъидритувал, ихтиярсузди гьюлин девлетар ишлетмиш апIрударихъди женг гъабхувал ва гьацдар жарадар ву. Крымдин полуостров, учв аьхюб даршра, сяргьятчи гъуллугъариз читин ва жавабдар участокарикан саб ву. Хъа гьамус Урусатди хусуси метлеб айи дявдин операция гъабхурайи вахтна, участокдин ляхин хъана гъагъи дубхьна.
Сяргьятарин тмунуб терефнаъ айи гъунши гъи душман духьнайи вахтна, сяргьятар уьрхюрайи эскрари гьаммишан мугъаятвал уьбхюра. Дурариз кюмек вуди деврин тIалабариз гъилигу ужуб техникайира ляхин апIура. ФСБ-йин Крымдин погрануправлениейи Украинайин терефнаан деетурайи жиниди зарар тувру, тIуркIру сяняаьтар айи квадрокоптерар вахтниинди дисбан бадали, лазим вуйи вари серенжемар кIули гъахура», – гъапнийи йиз сюгьбатчийи.

Дугъу гьацира къайд гъапIганси, Крым – курортарин регион ву. Мушван гьарсар 18-пи агьали туриствалин цирклиъ лихура. Улихьна йисари Крымдин курортарин кьиматар багьади вуйивализ дилигди, агьалйири вазар ккимиди гостиницйир дисуйи. Хъа гъубшу ва гьаму йисан Крымдиъ рягьятвал гъадабгъуз гъюру туристарин кьадар цIиб гъабхьну. Инсанариз Украинайихъди вуйи сяргьятарин багарихьна гъюз гучI дубхьна. Дидин гъавриъ ахьа, гизаф вахтна дици гъудрубзур дупну, умуд кивурхьа.
Сяргьятар уьрхюрайи дирбаш эскрар! Ичв машквар мубарак ибшри, гъит ихь сяргьятарин тмунуб терефнаъ гьарган дугъри гъуншйир ишри, учву гъабхурайи гъуллугъ саламатуб ибшри.