РД-йиъ айи Роспотребнадзорин управлениейи туву мялуматариинди, Каспийин гьюлик анжагъ Дербент райондин гъирагъдихътIан жикIуз ихтияр адар. Избербаш шагьрин аьтрафариин гьюлин ахтармишар гьелелиг дунадар. Хъа Мягьячгъала, Каспийск шагьрин ва Мягьярамкент райондин гъирагъарихъ гьюлик жикIуз къадагъа дапIна.

 

 

Каспийин гьюлик жикIру вахт 10-пи июндиан ккебгърайивализ дилигди, республикайиъ 70% канализацияйин чиркишнар саб жюрейииндира тартиб ва марцц дарапIди гьюлизди гъягъюра.
Лабораторияйин ахтармишари улупганси, гьюлин бязи йишварихь штун чиркинвалин гьял лазим вуйибтIан 30 ражари зади ву.

Гьаму йигъари Да-гъустандиъ, РФ-дин УК-йин «Гьюл чиркин апIувализ лигну» маддайиз асас вуди, хусуси касариина уголовный дело ачмиш гъапIну. Мягьячгъала шагьрин прокуратурайин табиаьт уьбхру отделин гъуллугъчйири рес-публикайин меркездиъ чпиантина къанунсузди гьюлизди чиркишнар гъягъюрайи бетондин турбйир ахтармиш гъапIну. Дурариан Каспийин гьюлиз деетнайи штари экологияйиз 22 миллион манатдин зарар тувну.

Гъийин йигъан саб суткайиъ 25 агъзур кубический метр канализацияйин чиркишнар марцц ва тартиб апIру гъурулуш анжаъ Дербент шагьриътIан адар. Думу гъурулуш багахь йигъари гьяракатнаъ ипбанди ву.