Табасаран халкьдин агьалйири хайлин жара регионариъ, гьятта жара уьлкйириъра кмиди лихури, чпи ляхин апIурайи йишвариъ заан хъуркьувалар гъазанмиш апIура. Дицдар касарикан ич редакцияйиз кми-кмиди хабрар гъюри шулу.
Санкт-Петербург шагьриъ медицинайинна санитарияйин 157-пи частнаъ (МСЧ 157) урологди ва УЗИ-духтирди лихурайи Табасаран райондин Ругуж гъулан агьали Мурад Ражабовра гьадрарикан сар ву.
Мурад, багъри гъулаъ ужудар аьгъювалариинди мектеб ккудубкIну, Дагъустандин гьюкуматдин медицинайин академияйик урхуз кучIвнийи. Му вуз 4,4 балл гъадабгъну ккудубкIну, дугъу 2014-пи йислан 2016-пи йисазкьан гьюкуматдин Санкт-Петербургдиъ Мечниковдин ччвурнахъ хъайи Кафари ригъ алабхъру терефнан медицинайин университетдиъ ординатурайиъ гъурхну. Ординатурара 5,0 баллиинди ккудубкIбаз лигну, гьадушв’ан думу, ужур духтир ву кIури, теклифнан кIаж хьади МСЧ 157 тешкилатдиз ляхниз гъадагъуру.
– «Университетдиан МСЧ-157 тешкилатдиз 27 кас гьаънийчу. Гьадрарин арайиъ 3 дережайиъди конкурс гъабхьнийи. Конкурсдин натижйириинди дидиъ иштирак гъахьи 27 касдигъян узутIан ляхниз гъадагъундайи. Гьадушваъ ляхниъ учIвбан кьяляхъ, 2017-пи йисан ультразвукдин (УЗИ) кюмекниинди иццрушин аьгъю апIувалин курсаризра гъушунза, ва гьамус гьадму ляхинра тамам апIураза»,
– ктибтнийи Мурад Ражабовди.
Хъа дагъустандин диплом хьади Санкт-Петербургдиъ ляхниъ учIвуз читинди вуйин, кIури гьерхиган, Мурад Ражабовди гьамциб жаваб тувнийи: «Анжагъ дагъустандин диплом ву кIури ваъ, мушваъ хайлин карханйириъ дагъустанлуйир ляхниз гъадагъуз ккундар. Узу сабсана конкурсдиъ гъалиб гъахьнийза, хъа больницайин отделениейин заведующийди, учухь гьацира гизаф дагъустанлуйир лихура, дупну, кьяляхъ гьаънийзу. Хъа дарш, ихь диплом хьайидар Санкт-Петербургдин вари цирклариъ лихура ва ужудар хъуркьувалар улупура».
Ич сюгьбатнаъ Мурад Ражабовичди мялум гъапIганси, «Земский врач» прог-раммайиъ иштирак духьну, гъулаъ лихуз гъач кIури, дугъахьна илтIикIу касарра хайлин а. Хъа гъулариъ, аьхю шагьрариъси дарди, пишейиан артмиш хьуз мумкинвал адар. Гьаддиз дугъаз му программайин дахилнаъ ляхин апIуз ккунди адар.
Чав апIурайи ляхникан улхури, жигьил духтри урологияйин цирклиъ ишлетмиш апIурайи гъийин деврин цIийи технологйириканра ктибтнийи. «Улихьди инсандин гурд-мариъ гъванар айиган, аьхю операцйир апIури гъахьну, хъа гьамус, юкь’анди гурдмихьна бицIи руб гъябгърубсиб урхъ дапIну, лазерин кюмекниинди гурдмиъ айи гъван биширугдиз илтIибкIура. Гъи операция гъапIиш, закур пациент хулаз гьаъра».
«Учухьна хайлин дагъустанлуйирра гъюри шулу. Гъюбан себебра гьадму вуки, Дагъустандиъ ужуди уьзур сагъ дарапIрайивал, операция лазим саягъниинди апIуз удудукьрувал ву. Мушваъ пациентдихьна янашмиш хьувалин тIалабар гизаф ижмидар ву. Эгер саб бицIи гъалатIкьан деебтиш, дишлади ляхниан утIурккуру ва уголовный делора гъитIибккуру»,
– аьлава гъапIнийи йиз сюгьбатчийи.
Мурад Ражабовдин ляхнин тажруба гьелелиг 5 йистIан даршра, дугъаз гъийин йигъаз хайлин гьюрматнан грамотйир, жюрбежюр сертификатар, дипломар а. Гьадрари думу ужур пишекар вуйиваликан мялум апIура.
Мурад, му баркаллу ляхниъ хъана заан хъуркьувалар ишривуз.
