Почтальон – кагъзар, газатар, журналар, посылкйир агьалйирихьна гъахурайи гъуллугъчи ву. Хайлин ватанагьлийир, хъа асас вуди жигьилар, мектебариъ урхурайидар ва студентар, улихьди му пишекриз ккилигури шуйи. Аьхиримжи йисари почтайин бязи отделенйирин вакиларикан гьеле-меле ужуб гаф ебхьури амдар. Вушра, почтайин идарйириъ лихурайидарин арайиъ намуслу ляхин апIурайидарра цIиб адар.

Йиз макьала гьацдарикан сар касдиз бахш апIуз ккундузуз.

«Урусатдин Почта» чIатху тешкилатдин почтальондин вазифйирик пулин переводар, багьалу бандеролар улупнайи касарин хилиз рукьувал, жюрбежюр корреспонденция (газатар, журналар) подписка дапIнайи агьалйирихьна гъабхувал, агьалйирихьан жюрбежюр йишвариз хътаъру кагъзар, посылкйир, бандеролар кьабул апIувал, пенсйир тувувал, ишлетмиш гъапIу газдин ва акварин пул гъадабгъувал, газатариз, журналариз подписка апIбан ляхин гъабхувал ва гьацира жара игьтияжар гьуркIувал кахьра»,

– ктибтура ич гюрюшдиъ Табасаран райондин ТIивак гъулан почтайин отделениейин начальник Зильфира Базутаевайи.

Почтайин отделениейиъ лихури, Зильфира Аьбдулмежидовнайин 16 йис шула. Сифте йисари думу аьдати почтальонди, хъа аьхиримжи хьуд йисан почтайин отделениейин начальникди лихура.

Зильфирайин гафариинди, почтальондин ляхин гъагъиб ву. Фицики гьар йигъан, йиф, мархь, микI дарпиди, агьал-йирин хулариз гъягъюри, газатар, журналар, пенсйир ва гьацдар жара мутмйир йишвариина рукьувал алабхъуру. Хъа, ТIивак гъулси, думу гъулхьан 8-10 километр манзилнаъ ерлешмиш духьнайи Гурхун ва ХустIил гъуларра гьаму гъулан поселениейик кахьра, гьаддиз думу гъулариъра почтайихъди аьлакьалу вари игьтияжар гьуркIну ккунду.

«Аьхиримжи вахтна Китай Республикайиан райондин агьалйириз гизаф посылкйир гъюра. Учу дурар вари вахтниинди йишвариина рукьурача. УчIру месэлйирикан улхуруш, вари идарйириъси, дурар почтайиъра а. Сабпи учIру месэла – почтальондин лап бицIи маважиб ву. Мисалназ, Гурхун, ХустIил гъулан поч-тальондиз саб вазлиъ гъапIу ляхниз туврайиб 4 агъзур манат ву. Дугъан гьадму пуликан саки вари машиндин бензиндихъ гъябгъюра. Эгер почтальонарин маважибар сацIиб за апIуз мумкинвал гъабхьнийиш, гизаф ужуди хьибдийи»,

– кIура Зильфира Аьбдулмежидовнайи.

Дугъаз вари гъул багъри гъабхьну. Фицики, гьамкьан йисари почтайиъ лихури, гъулаъ думу дурушу хал гьеле-меле амдар. Фунуб-вушра хизандиъ думу гьюрматлу хялижв ву. Хъа, саризра жиниб дар, гъи аьхю гъулариъ яшамиш шулайидарин аьхюнуб пай яшлу касар ву. Зильфира Базутаевайи дурарихьна варидарихьна чан хусуси рякъ гъабгну.