Варидариз мялум вуйиганси, гьюлихъ жикIру вахт улубкьна. Амма аьхиримжи йисари гьюлихъ шулайи бедбахтвалин дюшюшарин кьадар артухъ шула.
Магьа 13-пи июндиъ Дагъ.Огни шагьриъра бахтсузвалин дюшюш хьуз саб нуфттIан имдайи, амма шагьрин 4-пи нумрайин мектебдин 9-пи классдиъ урхурайи Расул Гьюсейнов кюмек духьну, кьюр живан аьжаликкан ккадахьну. Дурар кьюридра чвйир вуйи – 13 ва 14 йисан яшариъ айидар. Серфингдин тахтайиин элеъну, гьюлин лепйириин тамшир апIурайи живанар сабпну гьюликк ккахьуз хъюгъну. Му ляхникан хабар гъабхьи Расул дишла кюмекназ гъажаргъну ва кьюрид чвйирра сагъ-саламатди штуан адагъну.
Расул му йигъан фици гьюлихъна адахънуш, узуз дугъан адаш Аслан Гьюсейновди ктибтнийи.
«Узуз юкьюр бай айиз ва Расул дурарикан варитIан аьхюнур ву. Гьар тятIиларин вахтна узухъди ляхин апIури, думу йиз сагъу хилси шулиз. Улихьнаси дугъу, адаш уву ихтияр тувраш, гьюлихъна жикIуз гъягъюз ккундузуз гъапнийи. Къаршувал улупундайза, ва Расул узуз таниш касарихъди гьюлихъна гъушнийи. Саб бицIи вахт арайиан гъябгъяйизра, узуз телефондиан зенг дапIну, яв Расули гьюликк ккахьрайи кьюр бай ккадагъну кIуру хабар тувнийи. Узу, му хабрихъ хъугъраза, шаклу шуладарза кIури, жаваб тувнийза, фицики йиз юкьби баярра спортдиин машгъул вуйиз, фунуб ляхин апIузра гьевес кайидар вуйиз.
Узура уьмриъ кьюр бицIи шубар къутармиш гъапIур вуза. Дербент райондин Берикей кIуру гъулаъ кIурбар сагъ апIру мани батлагъ йишв а. Дина гизаф районариан хизанариинди гъюриъ, кьуршиъ учIври шулу. Саб ражари узура дина дуфнайза. Батлагъдиъ учIву кьюр бицIи риш жилиз зигуз хъюгънийи. Дурарин абйир-бабари, фу чара апIуруш мюгьтаж духьну, гьарйир апIуз хъюгъю. Дурарин чIигъар гъеерхьубси, дишла бицIидар ккадагъуз хъюгънийза… Гьамцдар дюшюшариъ швнуб-саб ражари инсанариз кюмек гъапIур вуза. Хъа гъи магьа йиз баярира думу ляхин давам апIура… Фици гъапишра, ихтиятвал дапIну ккунду. БицIидар гьаммишан гюзчиваликк гъитну ккунду», — аьлава гъапIнийи йиз сюгьбатчийи.
Гъи Расулин дирбаш’валикан вари сайтариъ мялуматар тувра. Дугъаз чухсагъул мялум апIуз гьамус Дагъ. Огни шагьрин администрацияйи, дугъу урхурайи 4-пи нумрайин мектебдин дирекцияйи тярифнан грамотйир гьязур апIура.
Расулин хизан Табасаран райондин Урзигъ гъул’ан Дагъ.Огнийиз кюч гъабхьиб ву. Мицир дирбаш бай тербияламиш гъапIу Аслан Сулеймановичдиз ва Эсмира Гьяжимурадовнайиз аьхю чухсагъул кIурхьа. Шлиз аьгъя, думу йигъан Расул багахь хьтайиш, кьюр чвйирин уьмур фици дигиш шулиш?
