Мициб сикинсуз, гъалаб кайи вахт кIул’ина гъюру дупну, Мягьямеддин фикриъкьан ади гъабхьундар. 2018-пи йисан дугъу Ростовский областдин Октябрьский райондиъ ерлешмиш дубхьнайи 150-пи мотострелковый бригадайин 68-пи танкарин полкнаъ гъуллугъ апIуз хъюгъру. Чан ляхниин аьшкьлу духьнайи Мягьямеддиз частнан аьхюри 2022-пи йисан 24-пи февралиъ гвачIнинган сяаьт хьубдиъ, ДНР ва ЛНР Киевдин миллетчивалин политикайин зулмиккан азад апIбан бадали, ухьу дина душну ккунду кIури, хабар тувру. Ва Мягьямед дишлади чан ротайихъди сатIиди рякъюъ учIвру. Чпин кIул’ина мицдар мусибатнан йигъар гъюр кIури, ротайиъ айи сар жигьилира фикир апIурадайи. Украинайиъ кIули гъабхурайи хусуси метлеб айи дявдин операцияйиъ Мягьямедди улупу жюрэтлуваликан ва игитваликан гъи хайлиндари ктибтура, фицики, чаз яман зийнар духьнашра, дугъу Ватандин бирмиш-буйругъ заан дережайиинди тамам апIури гъахьну.
Абакаров Мягьямед Пирмягьямедович 1994-пи йисан ТIаттил гъулаъ бабкан гъахьну. Думу хизандиъ варитIан аьхюну бай ву. Мягьямед, эвленмиш духьну, чав гъуллугъ апIурайи йишваъ жвуван хизандихъди дуланмиш шула. Узхьан дугъахъди гаф-чIал апIуз гъабхьундайзухьан, хъа дугъан хпир Эльмирайихъди аьлакьайиз удучIвну, телефондиан сюгьбат гъапIунча.
– Думу саб вахтнара чав наана гъягъюруш ктибтрур дайи. Хъа 24-пи февралиъ гвачIниган, учу Украинайин сяргьятарихъна гъягъюрча, гъапнийи. Амма имбу, чпи планламиш дапIнайи ляхникан гъапундайи. ВуйиштIан, дурар дишлади Украинайиз гьаъну. Садпи йигъланмина дурарин полк Донецк Халкьдин Республикайиъ кIули гъабхурайи хусуси метлеб айи дявдин операцияйин женгариъ иштирак шули гъабхьну. Учуз, 27-пи февралиъ Мягьямеддик гюллйир куркIну, думу кьушмарин аьзарханайиъ а, кIури, зенг гъапIнийи. Душваъ сагъ духьну, дишла кьяляхъ гъушу дугъаз 12-пи мартдиъ Мариуполиъ кьюбпи зиян шулу. Думуганра, ужуди сагъ хьайиз гъудрузди, госпиталиан Мягьямед дишла чан полкназ кьяляхъ гъафнийи.
– Мици хай шулдар, Мягьямед, яв зийнар сагъ духьну ккунду, – гъапиза жилириз телефондиан.
Адашдина дадайи чаз зенгар апIури, миннатар апIурушра, думу дерккуз гъабхьундайчухьан.
– Йиз варитIан аьхю зиян гьамусяаьтна кIваъ айиз. Узуз багьа вуйи дустар, узухъди гъуллугъ апIурайи швнур-сар кас дурари уьмрихьан гъапIну… Душман йиз ругарилан терг апIурза, – гъапи кьастлуди Мягьямедди.
27-пи мартдиъ дугъаз шубупи зиян шулу. Думу зиян лап гъагъиб гъабхьнийи, гьаддиз Мягьямед Москвайиъ айи кьушмарин аьзарханайиъ сагъ апIуз гъухнийи.
– Эльмира, Мягьямед хусуси метлеб айи дявдин операцияйин женгариъ иштирак шулайиган, яв кIваз фицдар хиялар-фикрар гъафнийив?
– Ухьу гьарури ихь уьмрин рякъ ктабгъру вахтна фикир дапIну ккунду. Улихьна йисари Мягьямед Табасаран райондиъ рякъяр апIру, гъир убзру заводдин машиндихъ лихурайи. Аьхирки, гьарсар жили-жвуваз чан Ватан уьбхюб хас вуйи ляхин ву кIури, контракт йибтIну, дугъу Урусатдин Яракьлу кьувватариъ гъуллугъ апIуз хъюгъну. Йиз кIулиз жюрбежюр фикрар ва хиялар гъафну кIури, узхьан фу апIуз ва пуз хьибдихъа? Ватан уьбхювал гьарсар жилижвуван вазифа, гардандиъ айи буржи ву. Хъа Мягьямед му гъуллугънаъ лихури адайишра, думу Украинайиз чан хушниинди гъягъруб аьгъяйзуз, гьаз гъапиш думу варис-мирасдин, гъуншдин, жямяаьтдин ляхин вушра, варидариз кюмек ва варидарин гъуллугъар тамам апIрур, гьаммишан гьарсаб ляхнин улихь шлур ву.
Инсандин кIул’ина гъюз ккайиб гъибди, хъа вушра, думу уьрхри кIури, Аллагьдиина аманат дапIназа.
– Гьамусяаьт дугъан бедендин гьял фициб ву, иццрушнар камийин?
– Ав, шубубпи ражари куркIу гюллйирин тикйир дугъан жигераригъна мурглин тIуларигъ гъярсну гъузна. Дугъан хъана операция апIруб ву. Гьаци вушра, гьамусяаьтра женгариъ иштирак шула.
Ватанди чан улихь дивнайи вазифйир намуслувалиинди тамам апIбаз лигну, Мягьямед Абакаровдиз Жуковдин медаль тувну.
Дугъан адаш Пирмягьямед ва дада Сарият ТIаттил гъулаъ дуланмиш шулайидар ву. Мицир дирбаш бай аьхю ва тербияламиш гъапIу дурариз аферин.
Мягьямеддиз кьюр гюрчег веледарра а – байна риш. Ихь игитриз жандин сагъ’вал ккун апIурхьа. Ихь эскрар гъалиб духьну, гъит Мягьямеддин кIван зиян сагъ ибшри. Му дяви дюн’яйиин аьхиримжи вуйиб ибшри.
