Улихьна йигъари республикайин антимонопольный гъуллугънан управлениейин кIулиъ айи Каир Бабаев, гьаму йисан 6 вазлин арайиъ чпи гъапIу ляхнин натижйир йивбан бадали, журналистарихъди гюрюшмиш гъахьну. Конференция ачмиш апIури, дугъу къайд гъапIганси, гъубшу йисан му гъурурлушдин рейтинг тяйин апIбан натижйириинди, республикайин управление, ужуди ляхин тамам апIбаз лигну, вари Урусатдин управленийирин арайиъ 2-пи дестейиъ абхъну.
Каир Бабаевди туву мялуматариинди, 6 вазлин арайиъ асас вуди тартиб гъапIу месэла гьисабназ гъадагънайи мутмйирихъди тямин апIрудари къанун чIур апIувалихъди аьлакьалу ву. Дурарин гьякьнаан лигурайи вахтнан арайиъ 63 аьрза тартиб дапIна. Тартиб гъапIу аьрзйирин натижйириинди, 28 тешкилатар къанун чIур апIурайидарси тасдикь дапIну, сиягьназ гъадагъну.
Мидланра гъайри, Каир Бабаевди йисандин эвелиан гъапIу тахсиркарвалариканра мялуматар тувну. Асас вуди дицистар тахсиркарвалар контракт йибтIру цирклариъ дапIна.
Хъа вари тахсиркарваларин гьякьнаан дуфнайи аьрзйирин кьадар 765 ву. Гьадму кьадарнакан 399 аьрзайин гьякьнаан, администартив къанун чIур дапIнайивализ лигну, делойир гъитIирккна. ДибикIну, 93 буйругъ тувна ва адагънайи 36 къарарниинди 27 миллионна 200 агъзур манатдин журум дапIна. Гьацира 217 гъуллугъариъ айи касар ва 11 юридическийна 2 физический касар жавабдарвалихъна духна.
