Гъябгъюрайи йисан июль вазлин 22-23-пи йигъари Хив райондин ГъуштIил гъулаъ, РД-йин Конституцияйин йигъаз бахш дапIну, футболиан «СТРОЙ-Лифт» ООО-йин пешкешариз вуйи райондин дережайин турнир кIули гъубшну.
Талитар ачмиш апIбан шадлугънан серенжемариъ Хив райондин глава Ярмет Ярметов, «Строй-Лифт» ООО-йин генеральный директор Тажудин Мазанов, РД-йин транспортдин министерствойин отделин начальник Сапиюллагь Уьсманов, ДагъГАУ-йин цифровизацияйин кафедрайин заведующийин вазифйир тамам апIурайи Руслан Мазанов, РД-йин хюрч апIру аьтрафарин генеральный директор Шамил Мягьямедов ва жарадар иштирак гъахьну.
Серенжем ачмиш апIури райондин главайи ва спонсорари дидин иштиракчйириз хъуркьувалар ва маракьлу талитар ккун гъапIнийи.
«ИкибаштIан, спортдин гьарсаб талитнаъ дирбаш’вал кайидар, кьувватлудар ва ужуб гьязурвал айидар гъалиб шули аьдат ву. Гъи райондин талитариз удучIвнайи командйиризра ужуб гьязурвал а. Ихь райондиъ аьхю футболиан талитар кIули дурурхри хайлин йисар ву, гьаддиз гьаму талитар тешкил апIувалиинди ухьу футболин гележегдин артмиш’вализ рякъ ачухъ апIурахьа. Му талитар кIули гъахувализ ихь дуст, гъардаш Тажудинди кюмекнан хил гьачIабккну. Магьа гъи ухьу гьамциб ужуб йигъан футболин дуствалин чюлиъ гюрюшмиш гъахьунхьа. Жягьтлувал улупу тешкилатчйиризра, футболин гьарсаб командайин иштиракчйиризра, тамашичйиризра чухсагъул мялум апIури, вари ихь рес-публикайин Конституцияйин йигъахъди тебрик апIураза. Му талитар тешкил апIури, цци сабпи раж ву, ва гележегдиъ му йигъаз бахш дапIнайи футболин талитар кIули гъахувал аьдатнаъ ипрухьа», – гъапну Ярмет Ярметовди.
Хив райондин культурайин отделин дахилнаъ айи жигьиларин политикайинна спортдин цирклин жавабдар пишекар Имамудин Агъабаевди, футболин талитарикан мялумат туври, ич сюгьбатнаъ къайд гъапIганси, турнириъ иштирак хьуз райондин саки 12-дихьна гъуларин командйир гьязур гъахьнийи. Амма жюрбежюр себебариан талитариз 6 командатIан удучIвундар.
«Хив гъулан футболин аьхю майдандиин гьамусяаьт расвалин ляхнар кIули гъахура. Гьаддиз футболиан талитар ГъуштIил гъулан футболин майдандиин тешкил апIуз мажбур гъахьнийча. Райондин главайи гъапиганси, аьхю футболиан Хив райондиъ талитар гъахуз мумкинвал даршули хайлин йисар вуйи. Гьамусдихъанмина думу талитар гьар йисан кIули гъахувал аьдатнаъ ипуз пландик ка. Райондин вакилариз футбол ккунду. Думу уйнамиш апIбиин маракьлу вуйидарра гизаф ахьуз. Аьхю футболиан ва мини-футболиан гъахру талитарин гизаф фаркь’вал а. Аьхю футболиъ иштирак шулайи спортсменарин кьадарра артухъди ву. Хъа, ухьуз рябкъюрайиганси, гъулариъ жигьилар гъузрадар. Гьаддиз футболин командйир уч апIуз цIиб читинвалар алахьура. Хъа улихьна йисари ГъуштIил, Хив, Гъвандик, Яракк, Ккугъ гъулариъ футболин кью-кьюб команда айи.
Мини-футболиан учу гьар йисан саб-кьюб ражари талитар гъахури шулча. Магьа гьаму багарихьди, хъа дюзди кIуруш, август вазлиъ, Хив гъулаъ мини-футболин цIийи майдан аб-ццру. Думу ачмиш апIру йигъан мини-футболиан гъуларин командйирин арайиъ талитарра тешкил апIурча», –гъапну Имамудин Агъабаевди.
ГъуштIил гъахьи талитарин натижйириинди сабпи йишв Чювекк гъулан футболин командайи гъадабгъну. Кьюбпи йишваз Хив гъулан, шубубпи йишваз — ЦIинитI гъулан футболин командйир удучIвну. ГъуштIил гъулан сборный команда юкьубпи йишван сагьиб гъабхьну.
Гъалибчйир, пешкешнан йишварин сагьибар ва жюрбежюр номинацйириан варитIан ужударстар спортсменар кубокариинди, дипломариинди, пулин ва жара пешкешар тувбиинди лишанлу гъапIну.
