Каспийск шагьур «Чемпион» клубдин пешкешар бадали тхеквондойиан вари Урусатдин талитарин иштиракчйир кьабул апIуз гьязур шула. Дидин гьякьнаан РД-йин спортдин ва физический культурайи министерствойин мялуматарин гъуллугъну хабар тувра.

 

 

Тхэквандо, мялум вуйиганси, кореяйин спортдин кчIихбарин искусство ву. Талитнаъ айидар артухъси ликар йивури кчIихуру.
Талитар 12-13-пи августдиъ Аьли Аьлиевдин ччвурнахъ хъайи спортдин ва жигьиларин дараматдиъ кIули гъягъиди.
Душваъ Урусатдин 27 региондиан 500-тIан артухъ спортсменар иштирак хьиди.

Талитарин пешкешар шубуб жюре яшнан жигьил баярин арайиъ пай апIиди: 12-14 йисаъ айидарин, 15-17 йисаъ айидарин ва 18 йистIан артухъ яш дубхьнайидарин.
КIваина хурача, думу талитар гьар йисан кIули гъахурайидар ву. Думу талитарин тамашачйирин кьадарра аьхюб вуди шулу.