Зирзибилихъди, штухъди ва рякъяр тикмиш апIбахъди аьлакьалу месэлийир гьаммишан учIруди дийигънайидар ву. Дупну ккундуки, гъи саб хайлин гъулар 21-пи аьсриз гъилигу яшайишдин шартIарихъди тямин дапIнадар. Хъа вушра, улихь-кIулихь хьайи гъуллугъчйиринна жямяаьтдин гаф саб гъабхьиган, му суалар гьял апIуз чарйир, рякъя-ражар агуз шулу.
Гъийин йиз макьалайиъ такабур Рубас нирихъди Ляхлаан Гуми гъулазди гъябгъюрайи рякъ рас апIбан ляхнарикан ктибтуз ккундузуз.
Му рякъ рас апIбан гьякьнаан ахтармиш’валар гъахури, узу Ляхла гъулан культурайин хулан директор, мектебдин мялим, ТОКС-дин дестейин идара апIурайи Фирудин Маллаевдихьна илтIикIнийза. Ич арайиъ гъабхьи сюгьбат жикъиди исихъ туврача.
– Фирудин Маллакеримович, улупнайи гъуларин арайиъ айи рякъ рас апIувал фици ва фтилан ккебгъуб ву?
– Гъябгъюрайи йисан майин вазлиъ Урусатдиъ дуланмиш шулайи ич язна, СВО-йин иштрикчи (йиз гъахи чуччун уьмрин юлдаш) Владислав Леонов чан хал-хизандихъди гъулаз гъафнийи. Дугъу гьар хябяхъган волейбол уйнамиш апIбиин машгъул духьнайи гъулан жигьилариз тамаши апIури шуйи. Ва сад йигъан дугъу узуз, жвуван дакьатарихъ волейболиан Ляхла гъулан ругариин райондин дережайин саб турнир тешкил апIуз ккунди азуз, гъапнийи. Амма, гьяйифки, гьавйири талитар тешкил апIуз мюгьлет туври адайи. Хъа, белки, дугъан дакьатарик рякъюн кьисмат кайиганра вушул.
– Фици рякъюн кьисмат? Ихь ватанагьлийир гъавриъ шлуганси кидибта.
– Янаки турнир тешкил апIбаз дугъу 50 агъзур манат тувруваликан гъапнийи. Гьадму йигъари райондин глава Ярмет Ярметовра нубатнан ражну гъуллан ул илбицуз дуфнайи. «Турнирра ужу ву. Хъа рякъюн суал думутIан учIруб вуйихь. Эгер гьаму улупнайи рякъюз ухьу бакар гъахьнийиш, ухьуз я гаф, я кьимат адайи», – гъапнийи дугъу. Гьаму гаф сяаьтнаъ абхъси, ляхниз илтIибкIну. Гьамци гафнииндира, ляхнииндира, пулин дакьатарииндира чав райондин главайи ужуб кюмек тувну, Украинайин сяргьятариин хусуси метлеб ади кIули гъябгъюрайи дявдин операцияйин иштиракчи Замир Гьяжимурадовдира 50 агъзур манат жара дапIну, гьадму дявдин иштиракчи, РД-йин Халкьдин Собраниейин депутат Расим Гьяжиагъаевди, гъулан глава Шамил Гьяжимурадовди му гаф ляхниз илтIибкIуз кьувват тувру вари чарйир гъагнийи. Мидланра савайи, Табасаран райондин глава Мягьямед Къурбановдира рякъ къайдайиз хуз кюмек вуди хил гьачIабккуз гаф тувна.
– Рякъ сар, кьюр касдин кюмекниинди тикмиш апIуз шлуб дар. Халкьдин терефнаан фициб лигувал ва кюмек а?
– Ав, дюз вува, дуст. Улупнайи касарин кюмек ктарди, узу йиз телефондин номер улупну, рякъ рас апIуз дакьатар уч апIувал уз’ина гъадабгъну, гьар йигъан лазим вуйи саягъниинди дидин гьякь-гьисаб гъабхураза.
Гьамци, вари сабхилди кюмекназ бакар духьну, гъийин йигъаз ургудварж агъзур манат уч дубхьна. Гьамусди рякъ’ин саб грейдер, саб экскаватор, шубуб КАМ-аз гьавайихьан мюгьлет ккабхъси лихура. Убкури, ккудубгъури йигълан-йигъаз рякъ уликкна хура. Гъяр’ин али бицIи машинар гъягъру-гъюру гакIвлин гъядран дигиш апIуз ният айич. Бетондин плитйир масу гъадагъуз кюмек апIбан гаф тувайдарра а.
– Сюгьбатнан аьхириъ ихь ватанагьлийириз фу пуз ккундийвуз?
– Саб гафниинди, гъуларин агьалйирин кюмек ва гаф саб дархьиш, фукIа арайиз гъюрдар. Чухсагъул ихь халкьдиз. Дурари ляхнииндира, пулииндира, гафнииндира чпихьан шлу кюмек апIура, ва гьацира бизар дарди рякъ’ин лихурайидариз нубатнахъди саб чIив уьлра гьивра. Гъит варидариз сабабар дикIри. ГъапIу харжар Аллагьди кьабул апIри. Алдагъу ликар Кябайиз гъушу гьисабариз гъадагъри. Гьацира, халкьдихьна илтIикIури, пуз ккундузуз. Гьамци гъапиган, жара фикирра мапIанай. Рякъюз кюмек апIуз ният айидариз ичв кюмекназ ккилигурача, кьан дар. Картайин реквизитар 4276 1609 2453 1883 ву, карта йиз телефондин номерихъра хъайиз: 8 (909) – 483 – 96 – 64 Фирудин Маллакеримович Маллаев. Гъавриъ хьувализ чухсагъул.
