Закур, 29-пи июлиъ, сяаьт хьубдин гьацIаъ (16:30) Хив райондин Гъвандккарин гъулан муниципалитетдиз дахил шулайи Сюгют гъулаъ мист абццди. Му хайирлу хабар ухьуз гъулан имам Сабир Гьяжиевди тувра.

 

 

Улупнайи гъулаъ абццрайи мист 13 метр ярхишин, 11 метр яркьушин айиб ву. Уьмумиди дидин аьхюшин 140 квадратдин, хъа айитIишв – 130 квадратдин метр ву. Мистаъ 180 динагьлийир уршру. Думу убхъру штухъди, гъудгни гъадагъру ва чIатинди гъяру йишварихъдира тямин дапIна.

КIваин апIуз ккундузуз. Сюгют гъул – Хив райондин варитIан кьанди тешкил гъапIу гъуларикан саб ву. Душваъ яшамиш шулайи жямяаьт асас вуди Яракк ва Гъвандикк гъулариан кючмиш духьнайи ватандашар ву. Гьаддиз душваъ муганайиз мистра адайи.

Гьамциб уьмарат тикмиш апIуз хайлин кюмек гъулан жямяаьтди, имамарра кIулиъ ади, райондин агьалйири тувну. Мидланра савайи, республикайин муфтиятдиан, миди вуйи шагьрар, районарианра саб жерге касар гъюри, кюмек апIури гъахьнийи. Гьацира дурари мистаз чпин терефнаан ва, гъирагъдиан тувну, уч дубхьнайи пулин дакьатарин кюмекра апIури гъахьнийи.

«Узуз, райондин имамарин советдин председатель Шябан Салигьов ва, гьяйифки, уьмриан гъушу Гюльмурад Уьмаров, женнет мюгькам апIричаз, кIулиъ ади, кюмекназ бакар гъахьи вари аьламдиз чухсагъул мялум апIуз ккундузуз. Гъит Сюгют ва миди вуйи гъуларин жямяаьтдиз уьмриъ алахьурайи вари читин месэлйир – штун, рякъюн, зирзибилин – гьамци сатIиди гьял апIуз, ужудар ниятар кIулиз адагъуз кьувват туври», – гъапнийи Сюгют гъулан имам Сабири.

Закурин серенжемдиз республикайин меркездиан хайлин аьлимар ва районариан гьюрматлу хялар гъиди. Дидиъ гьарсар касдихьан иштирак’вал апIуз шулу.