Июлин 25-пи йигълан августдин 3-пи йигъазкьан Кафари Кавказдин Федеральный округдин юкьуб региондин аьтрафариин – Дагъустандиъ, Чечендиъ, Ингушетияйиъ ва Кафари Осетияйиъ – миллетарин ара албагру вари халкьарин «Дуствалин маякар. Кавказдин чIвурдар» – 2023 волонтерарин 4-пи проект кIули гъябгъюра.
Дидин гьякьнаан 24-пи июлиъ «Дагъустан» РИА-йиъ кIули гъубшу пресс-конференцияйиъ МОДМС «Дуствалин маякар» образованиейин цирклин директор, «Дагълуйир» дестейин кIулиъ айи Загида Садикьовайи мялуматар тувнийи. Республикайин СМИ-йин вакиларихъди вуйи гюрюшдиъ Дагъустандин региондин «Дуставалин маякар. Дагъустан» жямяаьтлугъ гьяракатнан председатель Хасбат Тилакаева ва РД-йин милли политикайин ва диндин ляхнариз лигру министерствойин вакил Оксана Ибрагьимова иштирак гъахьнийи.
Загида Садикьовайин гафариинди, проектдин асас метлеб – жямяаьтлугъдин сатIи вуйи зегьметниинди, аьгъювалар гъадагъбиинди миллетарин арайиъ ислягьвал мюгькам апIувал ву. Проектдин девиз – «Кюмек апIувал, аьгъювалар гъадагъувал, ктибтувал, дустар агувал» ву. Волонтерари гвачIниан лисузкьан культурайинна тарихнан ирснан ядиграриин кюмек апIбан ляхнар кIули гъахиди, хъа лисхъан проектдин иштиракчйир чпи дуфнайи региондихъди таниш хьиди, мастер-классар гъахиди, экскурсйириз гъягъиди.
«Проектдин иштиракчйири гьар йигъан аьхириъ дневникариъ чпи гъапIу ляхникан, экскурсйириъ гъадагъу цIийи аьгъюваларикан фикрар дикIуру. Дневникар хусуси метлеб айи сайтдиъ ирчру. Гьаму йисан проектдиъ чпин хушниинди дуфнайи 45 иштиракчи а, мидланра савайи, иштиракчйирин аьтрафарра яркьу гъахьну. Узу регьбервал туврайи «Дагълуйир» дестейиъ Саратовдиан, Кемеровойиан, Дагъустандиан, Карачаево-Черкессияйиан, Кабардино-Балкарияйиан, Кафари Осетияйиан иштиракчйир а. ЛНР-иан, ДНР-иан, Херсондин ва Запорожьейин областариан баяр-шубарра иштирак шула», — къайд гъапIнийи Загида Садикьовайи.
Хасбат Тилакаевайи проект июндин 25-пи йигъан Владикавказдиъ ачмиш апIурайиваликан гъапнийи. Проект ачмиш апIбан кьяляхъ, дидин вари иштиракчйир чпин регионариз пай хьиди:
Хялар – Кафари Осетия-Аланияйиз: Алагир район, Хурумоварин чIвурд;
Люкьяр – Ингушетияйиз: Жейрах район, «Харп» чIвурдарин комплекс;
Дагълуйир – Дагъустандиз: Шамил район, Йирси Хиндах гъулаъ айи гъаравулвалин чIвурд.
Вари дестйири чпин регионариъ гъубху ляхнин натижйириз лигну, жикъи вахтнан фильмар адагъиди. Думу фильмар Чечен Республикайиъ проект хъябкьруган, экспедицияйин натижйир йивруган улупиди.
