Гьаму йигъари Хив райондиъ культурайинна рягьятвал гъадабгъру центрин гьяятдин майдандиин бицIидар уьрхбан Йигъаз бахш дапIнайи шадвалин серенжемар кIули гъушну.

Машквар РД-йин Халкьдин Собраниейин депутат Нариман Асваровдин жягьтлувалиинди ва муниципалитетдин администрацияйи кюмекниинди тешкил дапIнайиб вуйи.

Серенжемдиъ райондин мектебдиз улихьна вуйи образованиейин идарйириан 200- тIан артухъ бицIидар иштирак гъахьну.

Райондин администрацияйин терефнаан уч духьнайидар машкврихъди райондин образованиейин отделин начальник Казбек Къазиевди тебрик гъапIнийи. «БицIидарин умудар кIулиз адагъури, дурариз шадвал ва мюгькам фикир бахш апIувалиинди ухьу гележегдиз мюгькам жямяаьтлугъ насил тербияламиш апIурахьа. Ихь метлеб ихь веледар бахтлуди яшамиш шлу рякъяр яратмиш апIувал ву», – къайд гъапIнийи Казбек Къазиевди.

Нариман Асваровди чан улхбаъ Хив район вари уьлкейиз жюрбежюр цирклариан адлу гъапIу ватанагьлийириинди машгьур гъабхьиваликан гъапну.

«Спортдиъ, илимдиъ, аьгъювалар гъадагъбаъ хайлин ихь ватандашари чпин хъуркьувалариинди Хив район машгьур хьуз гъитра. Ухьу дурариинди дамагълу вухьа. Аргъаж шулайи наслиз нумунади улупру жигьилар ахьуз.

Гьюрматлу бицIидар!

Ичв машквар тебрик апIураза. Мюгькам рягьятвал гъадабгъай! Хъа абйир-бабариз ва тербиячйириз гьамци пуз ккундузуз: бицIидар – ихь уьмрин мяна ва шадвал ву. Ухьу туврайи кюмек, ихь ккунивал гьисс апIурайи бицIидар мюгькам сагъ’вал ади, ужудар аьгъювалариз гъадагъури аьхю шулу. Тербия тувбан ляхниъ учвуз сабур ва мугъаятвал ккун апIураза. Гъит, гьарсар бицIир манишнан, абйир-бабарин ккунивалин гьиссариъ аьхю ишри ва дурариз бажаранвал ачухъ апIру рякъяр агуз мумкинвалар дихъри», – аьлава гъапIнийи депутатди.

Машкврин тешкилатчйири бицIидариз жюрбежюр пешкешар тувнийи. БицIидарин багъариъ тербия гъадабгъурайидари хялариз чпи гьязур дапIнайи программа аьхю аьшкьниинди улупнийи.