Аьхиримжи йисари ихь республикайиъ ужудар дигиш’валар шулайиб ухьуз рябкъюрахьуз. Ухьу ихь тарихдихьна, культурайихьна, литературайихьна илтIикIуз хъюгънахьа. Июнь вазлин 24-пи йигъан Дагъустандин писателарин Союздиъ ихь халкьдин вакилар, аьлимар, шаирар уч гъахьну. Му гергми столин кIалибнан серенжем кIули гъабхбан себеб – ухьуз ади гъабхьи, амма аьхиримжи йисари чапдиан удудубчIврайи «Литературайин Табасаран» журнал цIийикIултIан абццбахъди аьлакьалу вуйи.
Серенжемдиъ Дагъустандин писателарин Союздин председатель Мягьямед Аьгьмедов, «Ппази», «Литературайин Дагъустан» журналарин кIулин редактор Мурад Аьгьмедов иштирак гъахьну.
Серенжем ачмиш апIури, табасаран писателарин секцияйин руководитель Сувайнат Кюребеговайи Пирмягьямад Аслановдиз гаф тувнийи. «Му шадвалин гьядиса ву. Ихь журнал удубчIвуз хъюгърайивалиин узу гизаф рази вуза. Редакторин вазифйир кIули гъахувал рягьят ляхин дар. Ихь арайиъ му ляхниз лайикьлу вуйир Сефижат Кьасумова ву. Ухьура, гъирагъдиъ гъудрузди, дугъаз кюмек апIидихьа»,- гъапну П.Аслановди. Гаьцира филологияйин илмарин доктор, профессор Муслим Къурбановди, лексикологияйин илимдин пишекар Шарафудин Дашдемировди му журналиъ, литературайин эсерарси, тарихдикан, чIалнакан вуйи макьалйирра чап дапIну ккуниваликан къайд гъапIну ва Сефижат Кьасумовайихьан му ляхин удукьруваликанра гъапну.
«Узу, му журнал чапдиан адапIуз чарйир зигури, улихьна йисари республикайин глава вуди гъахьи Рамазан Аьбдулатиповдихьнара швнуб-сабан илтIикIунза. Аьхиримжи вахтна табасаран халкьдин аьлимарин, писателарин, шаирарин чIалнахьна вуйи маракьлувал артухъ дубхьна», — къайд гъапIну Мягьямед Аьгьмедовичди.
Дербент шагьриъ айи литературайин «Гьевес» клубдин руководитель, шаир Эльмира Аьшурбеговайи, думу клубдин членар Аьбдурягьим Аьбдурягьмановди, Шюшеханум Мягьямедовайи, ихь журнал ужуб дережайинуб хьпан бадали, С.М.Кьасумовайиз кюмек апIуз гьязур вуйиваликан гъапну.
Му йигъан «Алеф» типографияйиан чан Ляхла гъулан тарихдикан вуйи китаб адабгъуз дуфнайи шаир, тарихчи Керим Маллаевдира уч духьнайидар вари му гьядисайихъди тебрик гъапIну.
Журналариъ ляхин апIурайи Мурад Аьгьмедовди, Сувайнат Кюребеговайи, Феруза Султановайи журналин гележег подпискайикан асиллу шлуваликан мялум гъапIну.
«Учу жюрбежюр серенжемар тешкил апIури, жюрбежюр жара серенжемариъ иштирак шули, Табасаран ва Хив районариз гъягъюри шулча. Ихь му йирси, цIийи журнализра подпискайин кюмек апIбан бадали, главйирихьнара, агьалйирихьнара илтIикIидича», – гъапну халкьдин писатель Шагьвелед Шагьмардановди.
Журналин редколлегияйиъ шлу писателар, аьлимар тасдикь дапIну. Багарихьди ихь журнал чапдиан удубчIвиди.
Дидин редактор цIийи ляхнихъди тебрик апIури, Сефижат Мягяьмедкеримовнайиз хъуркьувалар ккун апIурхьа.
