Табасаран райондин пресс-гъуллугънаан мялум гъапIганси, гъябгъюрайи йисан чвну Табасаран райондиъ машинар гъягъру Хючна-Хьарагъ рякъ рас апIуз планламиш дапIна. Аьхиримжи вахтна Хючна-Хьарагъ рякъюъ алабхъурайи, Пилигъ гъулазди вуйи рякъ рас апIбан ляхнар кIули гъягъюра.
Улихьна йигъари Табасаран райондин глава Мягьямед Къурбанов кIули ади РД-йин Халкьдин Собраниейин депутат Алавудин Мирзабалаев, «Дагестан Автодор» ГКУ-йин кIулиъ айирин заместитель Ханмягьямед Рягьимов ва подряддин тешкилатдин пишекрар рякъ рас апIбан ляхнар ахтармиш апIуз йишв’ина гъушну.
КIваин апIуз ккундучузки, му рякъ’ин гъябгъюрайи йисан апрель вазлихъан мина расвалин ляхнар кIули гъягъюра. Гьамусяаьт рякъ яркьу апIбан, газдин турбйир цIиб ярхласи зигбан ляхнар тамам апIура.
Думу ляхнар «Немо» ООО подряддин тешкилатдин деврин тIалабариз жаваб тувру техникайин кюмекниинди кIули гъахура.
Му тешкилатдин инженер Уьсман Аьлимирзаевдин гафариинди, рякъ рас апIбан вари ляхнар графикдиинди кIули гъахура ва сентябрин аьхириз дурар тамам дапIну ккудукIиди.
Уьсман Аьлимирзаевди къайд гъапIганси, машинар гъягъру му рякъ муниципалитетдин швнуб-саб гъул сатIи апIурайиб ву. «Кьюрдун вахтна рякъюн гъагъивализ, машар кайивализ лигну, рякъюъди машинар хъауз гъагъиди шуйи. Гьамус рякъ яркьу гъабхьну ва читинвалар арайиан адагъунча», – аьлава гъапIну инженери.
