/Конкурс/

Гьар инсанди ухди ясана кьанди чав бабкан гъахьи йишвкан фикир апIуру. Йиз бицIи ватан Хючна гъул ву. Гьелбетда, гьаму йишв узуз дюн’яйиъ вартIан йишв гъабхьну.
Хючна гъул – кюгьне ва аьхю гъуларикан саб ву. Думу вари терефарихъанди яркврари кьялаъ тапIна. Хючна гъулаъ гизаф гюрчег идарйир, аьхю клуб, кьюб аьхю мектеб, «Юлдаш» урхбан центр, шубуб бицIидарин багъ, гизаф туканар, почта, Кьалухъ Мирзайин ччвурнахъ хъайи спортдин комп-лекс ва жара идарйир а.

Гъулан гъирагъдихъан Рубас нир гъябгъюра. Гъулаъ учIвру йишвахь «Ургур чвуччвун ва сар чуччун» гъала ерлешмиш дубхьна, уччвуб шид убсрушв хьа. Узу «Юлдаш» МКОУ ЦО-йиъ урхураза. Ич мектеб гизаф уччвуб, ужуб ву. Душваъ дарсар киврайи мялимар гизаф ужудар ву. Мектебдин улихь хьайи багъдиъ гюмбет дийибгъна. Думу Ватандин Аьхю дявдиан кьяляхъ дарфи игитариз дивнайиб ву.

Мектебдин кьяляхъ аьхю майдан хъа. Майдандиин физкультура дарсназ лазим вуйи турникар ва жара спортдин алатар ал. Узу мектебдиан хулаз гъюруган, паркдиъ гьарган баяр-шубар ади шулу.  
Узуз йиз гъул гизаф ккундузуз ва думу гьар йисан хъанара артухъ артмиш, марцц ва уткан хьибди кIури, умуд кайиз.

 

Хючна гъулан гъяр (Цалак гъулан терефназди)
Самира Амирханова, Хючна гъул, МКОУ ЦО «Юлдаш», 5-пи класс